एसएमएसपाखें क्वइशन आउट !
येँ (सन्ध्या टाइम्स)/विद्यार्थीतय्गु भविष्य निर्माणया मू ध्वाखा धाइगु एसएलसीया जाँच थनिंनिसें न्ह्यात। थौं सुथय् ८ बजेनिसें न्ह्याःगु अंग्रेजी विषयया न्ह्यसःपौ रुकुमय् धाःसा जाँच शुरु जुइ स्वयां १५ मिनेट न्ह्यः हे पिहां वःगु दु।
अनया शितल उच्चमाविइ परीक्षा शुरु जुइ सिबें १५ मिनेट न्ह्यः मोबाइलपाखें न्ह्यसःपौ पिने पिहांवःगु खँ अभिभावकतय्सं धाःगु दु। एक्जाम्टेड परीक्षार्थीतय् क्वथा नं. २ पाखें निरीक्षकं मोबाइलपाखें न्ह्यसःपौ एसएमएस यानाः हःगु खँ धाःगु दु ।
उखे सप्तरीया बहनगामाकट्टीइ परीक्षा क्वथाय् दुहां वंपिं परीक्षार्थीतय् सुरक्षाकर्मीं चेकजाँच याःगु खँयात कयाः स्थानीयवासी व सुरक्षाकर्मी दथुइ ल्वापु जूगु दु। उकिं यानाः परिक्षा ७ मिनेट ढिला जूवंगु खः ।
थुगुसीया परीक्षा व आकिवंया एसएलसी जक राष्ट्रियस्तरया जुइसा अनं लिपा क्षेत्रीय स्तरं हे एसएलसी जुइ। निदँ लिपां राष्ट्रियस्तरया परीक्षा कक्षा १२ य् जक कायेगु तयारी याःगु दु। उकियात एचएसएलसी धाइ। थुगुसीया परीक्षाय् ४ लाख ५६ हजार ७१९ म्हेस्यां जाँच बियाच्वंगु दु ।
