लः मवयाः खानेपानी ज्याकू घेराउ
ख्वप (सन्ध्या टाइम्स)/ख्वपया थीथी थासय् लः मवयाच्वंगु समस्यायात कयाः वडा नं. - २ व ३ या स्थानीय जनताया प्रतिनिधि मण्डलं खानेपानी संस्थानय् घेराउ यात। काठमाडौं उपत्यका खानेपानी लिमिटेड ख्वप शाखाया ज्याकुथी वनाः प्रतिनिधि मण्डलं त्वनेगु लःया समस्या बारे ध्यान मतःगु व न्हूगु लःया स्रोत मालेगु ज्या मयासें न्ह्यःनेलाःथे हिति वितरण यानाच्वंगु खँय् विरोध प्वंकूगु खः। खास यानाः काठमाडौं उपत्यका खानेपानी लिमिटेड ख्वप शाखाया छुं कर्मचारीतय्सं हे अथे लाथेपाथे दां नयाः हिति वितरण यानाच्वंगु द्वपं बिउगु दु ।
अप्वः यानाः मिस्तय्गु सहभागिता दुगु उगु घेराउ लिपा अनया कर्मचारी राजकुमार श्रेष्ठं पर्याप्त बजेट मवःगुलिं ज्या दिनाच्वंगु व समस्या बारे हाकीमयात जानकारी बीगु आश्वासन बियादीगु खः। ख्वपया थाय्थासय् लः मदयाः तुंथिइ तकं लः कयाच्वंगु व भौल्वाछेँ त्वालय् फोहोरगु धःया लः तकं ल्वाकज्याःगु लः वयाच्वंगु खँ नं सीदुगु दु ।
