ज्ञानेन्द्रं म्हगसय् न्ववाःगु जुइ : ठाकुर
तराई मधेश लोकतान्त्रिक पार्टीया अध्यक्ष महन्थ ठाकुरं पुलांम्ह जुजु ज्ञानेन्द्र शाहं राजतन्त्र समाप्त मजुनीगु धकाः बियादीगु अभिव्यक्तियात कयाः आश्चर्य प्वंकादीगु दु । वय्कलं ज्ञानेन्द्रं राजतन्त्र समाप्त मजूनीगु खँ म्हगसय् खंकूगु जुइ धकाः टिप्पणी यानादिल । नापं वय्कलं व्यंग्य यानादिसें धयादिल, 'राजतन्त्र समाप्त मजुनीगु धकाः ज्ञानेन्द्रं म्हगसय् धाःगु जुइ ।'
बिहीवाः सुथय् राजविराजय् याःगु पत्रकार सम्मेलनय् न्ववानादिसें नेता ठाकुरं नेपाःया राजनीतिया शिखर पुरुष गिरिजाप्रसाद कोइरालाया निधनं देशं अभिभावक तंकेमाःगु धयादिसें इलय् हे संविधान निर्माण याःसा जक वय्क प्रति सच्चा श्रद्धाञ्जली जुइगु बिचाः प्वंकादिल ।
प्रमुख राजनीतिक दलत सत्ताया कासाय् लगे जूगुलिं शान्ति प्रकृया व संविधान निर्माण निगूलिं ओझेलय् लाःगु धयादिल । वय्कलं लोकतान्त्रिक पद्वतिलय् सरकार परिवर्तनया सम्भावना जुयातुं च्वनीगु धयादिसें वर्तमान सरकार परिवर्तनया धाःसाः छुं नं सम्भावना मदुगु धयादिल ।
