राजतन्त्र समाप्त जूगु खँ 'हाइपोथेटिकल' : ज्ञानेन्द्र

पुलांम्ह जुजु ज्ञानेन्द्र शाहं राजतन्त्र समाप्त जूगु खँ काल्पनिक जक जूगु खँ धयादीगु दु । स्वदँ न्ह्यः नेपालय् गणतन्त्रया पलिस्था लिपाः नेपाःया मिडिया नाप न्हापांगु खुसीइ खँल्हाबंला यानादिसें वय्कलं धयादिल, - 'राजतन्त्र समाप्त जुल धायेगु भचा हाइपोथेटिकल जुइ ।'

रामनवमिया अवसरय् जनकपुरय् जानकी मन्दिरय् पूजा यायेतझाम्ह ज्ञानेन्द्रं एभिन्युज टेलिभिजनयात अर्न्तवार्ता बियादिसें वय्कलं राजसंस्था वा मेगू राष्ट्रिय सवालय् जनताया बिचाः हे महत्वपूर्ण जुइगु धयादिसें जनताया चहाना थःत मान्य जुइगु धयादिल । वय्कलं जनतायात राजतन्त्रया समाप्तिं चित्त बुझेमजूगु खसाः जनताया हे खँयात मान्यता बीमाःगु धयादिल ।'

शाहं इतिहासय् स्व:साः नेपालय् राजतन्त्र च्वये क्वये जुयाच्वंगु खनेदइगु धयादिल । वय्कलं नेपाःया जुजुतय्सं गबलें नं शक्ति ल्हातय् कायेत मस्वःगु धयादिसें थुगु भ्रमयात न्हंकेमाःगु धयादिल । राजसंस्थायात हानं पुर्नस्थापना यायेत थःम्हं छुं भूमिका मम्हिताःगु धयादिसें अज्याःगु ज्या थः पाखें जूगु खःसाः थ्व यक्व हे न्ह्यने वनेधुंकीगु दाबी यानादिल ।

वय्कलं देय् त्वःताः पिने वनेगु थ:गु योजना मदुगु धयादिसें थन हे नेपाः व नेपाःमिया सेवा यायेगु योजना दुगु धयादिल । नापं वय्कलं सर्वसाधरणया सुरक्षा कमजोर जूगु धयादिसें थःत देय् व जनताया चिन्ता जूगु धयादिल ।