हिन्दू राज्य दयेकेत भारतया हस्तक्षेप

नेपाःयात हानं हिन्दू राष्ट्र घोषणा याकेगु लागिं भारतीय चलखेल अप्वइगु खतरा खने दया वःगु दु। मदुम्ह गिरिजा प्रसाद कोइरालायात अन्तिम श्रद्धांजलि प्वंकेत नेपाः वःम्ह भारतीय जनता पार्टीया पुलांम्ह अध्यक्ष राजनाथ सिंहं आः नकतिनि छगू ज्याझ्वलय् न्ववासें नेपाःयात हिन्दू राज्य दयेकेत थःपिंसं ग्वाहालि यायेगु खँ कनादीगु दु। नेपाःयात गज्याःगु राज्य दयेकेगु धकाः निर्णय यायेगु अधिकार नेपाली जनतायाके जक दु। भाजपा नेताया थ्व अभिव्यक्तिं नेपाःया सम्पूर्ण गैरहिन्दू जनताया नुगलय् घाः लाका बिउगु दुसा थ्व नेपाःया आन्तरिक मामिलाय् याःगु हस्तक्षेप नं खः। जुजुया याक्वय् सुलाः राष्ट्रवादया शंख पुइपिं कार्यकर्तात राजनाथया थ्व धापुतिं झीगु देय्या आन्तरिक मामिलाय् हस्तक्षेप जुल धकाः विरोधय् पिहां मवःगु आश्चर्यया खँ खः।
नेपाः हिन्दू राष्ट्र मजुइवं हिन्दू धर्मयात अपमान याःगु जुइ मखु। थ्व ला फुक्क धर्मयात सम्मान याःगु जुइ। राजनाथ सिंहं हिन्दू दर्शनया विशद व्याख्या नं यानादीगु दु। हिन्दू दर्शनया थ्व व्याख्यायात खण्डन यायेमाःगु आवश्यकता नं मदु। छाय्धाःसां धर्म व दर्शनया रुपय् हिन्दू छगू महान सभ्यता खः धइगु खँय् शंका मदु। बरु थुकियात गलत रुपं छ्यलेगु ज्या ला थ्वहे राजनाथया भाजपां भारतय् यानाच्वंगु दु। गबलें बाबरी मस्जिद ध्वस्त यानाःसा गबलें सोनिया गान्धीया नागरिकया मुद्दा ल्ह्वनाः। यदि हिन्दू धर्मया विशालता, सहिष्णुता व सहभावनायात धाथें हे आत्मसात यायेगु खःसा नेपाःयात धर्म निरपेक्ष राज्य घोषणा याःगु खँय् सुं नं हिन्दूं विरोध वा आपत्ति यायेमाःगु आवश्यकता मदइगु खइ ।