देय् दबुलिं भक्तिदास लुमंकल
येँ (सन्ध्या टाइम्स)/नेवाः देय् दबूया ग्वसालय् वंगु चिल्लागा पंचमी कुन्हु नेवाः देय् दबूया संस्थापक नायः नापं संरक्षक मदुम्ह भक्तिदास श्रेष्ठयात लुमंकाः परोपकार उच्च माविया सभा कक्षय् श्रद्धाञ्जली सभा जुल ।
नेवाः देय् दबूया नायः नरेश ताम्रकार सभापति जुयादीगु उगु ज्याझ्वलय् नेपालभाषा संस्कृति ख्यःया आपालं नांजाःपिं हनेबहःपिनि सहभागिता दुगु खः। ज्याझ्वलय् प्रा. माणिकलाल श्रेष्ठं मदुम्ह भक्तिदास श्रेष्ठलिसे ज्या यानागु इलय्या लुमन्ति न्ह्यब्वयादिल। पुलांम्ह सांसद लक्ष्मीदास मानन्धरं मदुम्ह श्रेष्ठया ब्यक्तित्व व कृतित्व बारे कनादिल ।
नेवाः देय् दबूया संरक्षक मल्ल के. सुन्दरं भक्तिदास श्रेष्ठ नेवाः देय् दबूया परिकल्पनाकार जूगु खँ न्ह्यथनादिसें वय्कः नेपालभाषा आन्दोलनया छम्ह अथक योद्धा जूगु खँ नं कनादिल। देय् दबूया मेम्ह संरक्षक लक्ष्मण राजवंशीं वय्कः मदयाः नेवाः ख्यलय् पूमवनीगु क्षति जूगु खँ न्ह्यथनादिल ।
