राप्रपाया अनिश्चितकालीन आन्दोलन
येँ (सन्ध्या टाइम्स)/राजतन्त्र व हिन्दू राष्ट्रया विषयय् जनमत संग्रह यायेमाःगु माग यासें राष्ट्रिय प्रजातन्त्र पार्टी नेपालं जेठया न्हापांगु वाःनिसें अनिश्चितकाल तक आन्दोलन न्ह्याकीगु जूगु दु ।
म्हिगः च्वंगु उगु पार्टीया केन्द्रीय मुँज्यां जनजागरण अभियान धकाः थ्वहे वइगु चैत्र २० गतेनिसें लछि तक थाय्थासय् सभा, अन्तर्क्रिया नापं थीथी कथंया ज्याझ्वः यायेगु अले क्षेत्रीय व अञ्चलस्तरीय पार्टीपाखें माःगु कथं क्षेत्र व अञ्चलस्तरीय बन्द ज्याझ्वः तक यायेगु निर्णय याःगु दु। उगु मुँज्यां वर्तमान सरकार पूर्णरुपं असफल जूगु ठहर यासें आःया राजनीति तसकं तरल अवस्थाय् लानाच्वंगुलिं आः थथें हे सरकारयात बिया तयागु समर्थन धाःसा लित मकायेगु तर लिपा उकिया बारे पुनर्विचार यायेगु निर्णय याःगु दु ।
अथे हे जेष्ठ १४ गते न्हूगु संविधान जारी याये मफुसा न्हूगु जनादेशया निंतिं तत्काल हे चुनाव घोषणा यायेमाःगु माग नं राष्ट्रिय प्रजातन्त्र पार्टी नेपालं याःगु दु। थःपिनि थुपिं मागयात कयाः राप्रपा नेपालं वंगु छुं ई न्ह्यवंनिसे लगातार आन्दोलन याना वयाच्वंगु दु ।
