तीर्थ यात्राया बस दुर्घटना
येँ (सन्ध्या टाइम्स)/पश्चिम चितवनया मेघौलीलागाया पर्साढापय् तीर्थयात्रुत ज्वनावंगु बस थौं सुथय् दुर्घटना जुया छम्ह सीगु दु। उगु दुर्घटनाय् लाना सीम्ह मेघौलीया २२ दँ दुम्ह बामदेव कुमाल खः धकाः प्रहरीं न्ह्यथंगु दु ।
उगु दुर्घटनाय् लाना झिंच्याम्ह घाःपाः जूगु दु। घाःपाः जूपिं मध्ये मेघौलीया हे १९ दँ दुम्ह काईला कुमाल व १५ दँ दुम्ह शिव कुमालया अवस्था गम्भीर दु। घाःपाः जूपिन्त भरतपुर मेडिकल कलेज व मेमेथाय् वासः यायेगु ज्या जुयाच्वंगु दु। तीर्थयात्रुत ज्वना जितपुरं बिक्रमबाबा वनाच्वंगु ना ३ ख ५५६३ नम्बरया बस बेतीनी खुसी कुतुंवना दुर्घटना जूगु खः। दुर्घटना जूगु बसय् ७० म्ह च्वना वनाच्वंगु खः धकाः नं प्रहरीं धाःगु दु। दुर्घटनाया बारे अनुसन्धान जुयाच्वंगु दु ।
