द्वन्द्व पीडित मस्तय् निंतिं तालिम
येँ (सन्ध्या टाइम्स)/ न्यादँ न्ह्यः स्वंगु पार्टनरसिप फर प्राटेक्टिङ्ग चिल्ड्रेन इन कन्फ्लिक्ट (पीपीसीसी) राष्ट्रिय सञ्जाल संस्थां थःपिनि ज्याझ्वः जुयाच्वंगु थीथी झिंन्यागू जिल्लाया ख्वीम्ह प्रतिनिधि ज्याकःमिपिंत द्वन्द्व पीडित मस्तय्त उद्धार यायेगु निंतिं कार्यनीति व रणनीति तयार यायेत स्वन्हुयंकंया वृहत् तालिम गोष्ठी शुरु याःगु दु ।
उगु तालिमय् यूनिसेफ व यूएनडीपीया थीथी श्रोत ब्यक्तितय्सं तालिम बीगुया नापनापं न्यूयोर्क वाच लिष्ट संस्थाया प्रतिनिधि मय्जु सेभरिनपाखें नं तालिम बीगु ज्याझ्वः दु। तालिम ज्याझ्वःयात कयाः जूगु समारोहय् उगु राष्ट्रिय सञ्जालया अध्यक्ष व बालबालिका तथा वातावरण सरोकार नेपाल कन्सर्नया कार्यकारी निर्देशक विजय सैंजूं उगु गोष्ठीया उलेज्या यानादिसें लसकुस यानादीगु खः।
उगु तालिम गोष्ठीइ एड्भोकेसी, फोरमया कार्यकारी अध्यक्ष मन्दिरा शर्मा व हिमराइट्या अध्यक्ष अञ्जना शाक्यपिंसं नं द्वन्द्व पीडित मस्तय्गु समस्या व वर्तमान चुनौतियात कयाः न्ववानादीगु खः। उगु तालिम थौं बुधवाः तक न्ह्याइगु ग्वसाः दु ।
