साग त्याका वःपिं शाक्य कासामि हना
येँ (सन्ध्या टाइम्स)/दी शाक्य फाउण्डेशन नेपाल २०५७ या गुक्वःगु दँमुँज्या उगु संस्थाया सल्लाहकार संघरत्न शाक्यं उलेज्या यानादिल। ज्याझ्वलय् वय्कलं प्रवेशिका परीक्षा ताःलाःपिं शाक्य विद्यार्थीतय्त हनेज्या यानादिल। ज्याझ्वलय् साग कासाय् सहभागी शाक्य कासामिपिंत नं हन ।
एसएलसी परीक्षाय् दकलय् अप्वः ल्याः हयाः ताःलाःपिं कुलपुत्र व कुलपुत्री अनिशरत्न शाक्य व अनिशा शाक्ययात सिरपाः लःल्हाःगु उगु ज्याझ्वलय् टेक्वाण्डो कासामि आयुषा शाक्य व कराँते कासामि विनोद शाक्यपिंत हनेज्या याःगु खः। नापं फाउण्डेशनया थीथी ज्याय् ग्वाहालि याना वयाच्वंपिं १२ म्ह मिसा दुजःपिंत नं लय्ताःपौ देछानाः हनेज्या जूगु खः ।
ज्याझ्वलय् दी शाक्य फाउण्डेशनया महासचिव जनक नेवाः शाक्यं वंगु दँया वार्षिक प्रतिवेदन व वइगु दँया भावी कार्ययोजना बारे तयार यानातःगु संस्थाया प्रतिवेदन न्ह्यब्वयादिलसा कोषाध्यक्ष राजकाजी शाक्यं ल्याःचाः न्यंकादिल ।
ज्याझ्वलय् मुँज्याया नायः देवकाजी शाक्यं उगु फाउण्डेशन तमाम नेवाः शाक्य समुदायया संस्था खः धयादिल। शाक्य फाउण्डेशन दयेक दयेकं मेगु राष्ट्रिय समाज हथासं चायेकेगु ज्यायात शाक्यतय्त फायेगु राजनीति खः धकाः नं वय्कलं द्वपं बियादिल ।
अनागारिका डा. अनुजा गुरुमां नापं सल्लाहकार व ज्यासना पुचःया दुजःपिं जानाः बोधिमत च्याकाः उलेज्या याःगु उगु ज्याझ्वलय् उपाध्यक्ष हर्षमुनि शाक्यं लसकुस यासें दोलखाया शाक्यतय् बारे कनादीगु खः। ज्याझ्वलय् दुजः प्रकाश शाक्यं सुभाय् देछानादिल ।
