'इलय् हे संविधान निर्माणय् कोइराला प्रतिया श्रद्धाञ्जलि'
राष्ट्रपति डा. रामवरण यादवं इलय् हे संविधान जारी यानाः शान्ति प्रकृयायात तार्किक निष्कर्षय् थ्यंकेगु हे कांग्रेस सभापति गिरिजाप्रसाद कोइराला प्रति धाथेंया श्रद्धाञ्जली जुइगु खँ धयादीगु दु ।
छुं दिं आराम यायेत थःगु गांमय् सोमवाः थ्यंकादीम्ह यादवं मंगलवाः सुथय् संचारकर्मीत नाप खँल्हाबंला यानादिसें संविधान च्वयेगु व शान्ति प्रकृयायात तार्किक निष्कर्षय् थ्यंकेगु हे दक्वं राजनीतिक दलया प्रमखु एजेण्डा जुइमाःगु धयादिल । वय्कलं थ्व हे कोइरालाया नं इच्छा जूगुलिं इलय् हे संविधान जारी व शान्ति प्रृकया पूवंकुसाः कोइराला प्रति धाथेंया श्रद्धाञ्जली जुइगु धयादिल ।
व्य्कलं संविधान निर्माण प्रकृयां गति कायेमफुगु प्रति च्यूताः प्वंकादिसें संविधान निर्माणया निंतिं राजनीतिक दल, नागरिक समाजया अगुवा लगायत दक्वं वर्ग व क्षेत्रया नेपाःमि नाप राष्ट्र प्रमुखया रुपय् थःम्हं सहलह न्ह्याकाच्वनाःगु धयादिल ।
दक्वं दलत मिलेजुया इलय् हे संविधान निर्माण यायेगुया विकल्प मदुगु धयादिसें वय्कलं दक्वं छप्पँ जुसाः इलय् हे संविधान निर्माण जुइगु विश्वास प्वंकादिल ।
