बर्दिया घटनाय् सीपिं वन्यजन्तु शिकारी : सेना
बर्दिया राष्ट्रिय निकुञ्जया बाँसपानी इलाकाय् नेपाली सेनां स्याःपिं स्वम्ह मिसापिं वन्यजन्तु चोरी शिकारी याइपिं जूगु दावी सेनां याःगु दु । सेनां उपिं नाप गोली, विषादि, विष्फोटक पदार्थ व ल्वाभः दुगु दाबी यासें संचार माध्यमय् वःगु कथं उपिं स्थानीय मजूगु दावी याःगु दु ।
सैनिक जनसम्पर्क निर्देशनालयं सोमवाः छगू विज्ञप्ति पिथनाः वन्यजन्तु चोरी शिकारीया निंतिं झिंन्हय्म्ह अन दुहांवःगु विशेष शुराकीया आधारय् सेना अन थ्यंकू खँ न्ह्यथंसें उपिं अन मि पनाच्वंगु व सेनां बिस्यूं मवनेत इनाप याःगु इलय् उमिसं गोलीं क्येकूगु खँ धाःगु दु । सेनां निक्वः तक बिस्यूं मवनेत इनाप याःगु इलय् उमिसं गोली चले याःगुलिं आत्मरक्षाया निंतिं न्युनतम बल छ्यलाः गोली चले याःगु इलय् उपिं सीगु खँ विज्ञप्तिइ न्ह्यथंनातःगु दु ।
संचार माध्यमय् वः कथं बलात्कार लिपाः हत्या जूगु खँ असत्य जूगु दावी यासें सेनां फागुन २६ गते बहनी च्याताः इलय् उगु घटना जुइवं निम्ह अन हे सीगु व छम्ह लिपा जक सीगु खँ नं धाःगु दु । अथेहे
विज्ञप्तिइ सरकारं थुकीया बारे छानबिन यायेत गठन याःगु आयोगयात पूर्णरुपं ग्वाहालि यायेगु प्रतिबद्धता नं प्वंकूगु दु ।
