'कोइराला प्रतिया सम्मानं जिम्मेवारी अप्वल'
नेपाली कांग्रेसया सभापति गिरिजाप्रसाद कोइरालाया निधन प्रति श्रद्धाञ्जली ब्यूपिं व वय्कया सम्मानय् शवयात्राय् कुहांवःगु जनसागरं जिम्मेवारी अप्वःगु खँ कांग्रेसं धाःगु दु ।
सोमवाः च्वंगु कांग्रेसया संसदीय दलया बैठक लिपाः छगू विज्ञप्ति पिथंसें कांग्रेसं जनतां कांग्रेस प्रति तःगु अपेक्षां विशेष जिम्मेवारी थप जूगु महसूस यासें थुकी सजक व दृढ जूगु खँ न्ह्यथंगु दु । कोइरालाया सम्मानय् कुहांवःगु जनसागर वय्कप्रति जनतां क्यंगु सम्मान जूगु ठहर यासें कांग्रेसं थुकीया निंतिं दक्वं जनसमुदाय प्रति आभार व्यक्त यासें सुभाय् ब्यूगु दु ।
संसदीया दलया नेता रामचन्द्र पौडेलया सभापतित्वय् च्वंगु बैठकं कोइरालाया निधनप्रति शोक व्यक्त याःगु दु । नेपाली लोकतान्त्रिक आन्दोलनया शिखर पुरुष, शान्ति प्रकृयाया अग्रणी नेता कोइरालाया निधनं दक्वं नेपाःमि शोकमग्न जूगु धासें बैठकं धैर्य धारणा यायेत इनाप याःगु दु ।
