हिन्दू राज्यया निंतिं भूमिगत संघर्ष

येँ (सन्ध्या टाइम्स)/अन्तरिम संविधानय् हे धर्म निरपेक्ष राज्य अले संघीय लोकतान्त्रिक गणतन्त्र धकाः उल्लेख जुइधुंकूगु अवस्थाय् हिन्दू राष्ट्र व राजसंस्थायात कयाः लिपांगु इलय् राजनीतिक पार्टी नापं थीथी ख्यलं सक्रिय भूमिका म्हितेगु नापं आन्दोलन तकं यानाहःगु दु ।

राजसंस्थाया सवालयात कयाः जनमत संग्रह यायेमाःगु नापं नेपाःयात धर्म निरपेक्ष राज्य धकाः घोषणा याःगु जनताया भावनाया अःखः खः धकाः दावी यानाः हाकनं नेपाःयात हिन्दू राष्ट्र धकाः घोषणा यायेमाःगु माग यासें आन्दोलन यानाः सक्रिय जुया वयाच्वंगु खःसा आः वयाः उगु एजेण्डायात कयाः भूमिगत आन्दोलन हे न्ह्याका हःगु खनेदु। नेपाःया मध्य व सुदूरपश्चिम लागाय् भिष्म एकता परिषद नांगु छगू भूमिगत पुचलं थौं अन बन्द तकं आह्वान याःगु दु। भूमिगत पुचः भिष्म एकता परिषदया कार्यकर्तातय्सं बन्द आह्वानयात अवज्ञा याःगु धकाः कन्चनपुरय् खुगः अले कैलालीइ स्वगः गाडीइ मि तयाः ध्वस्त याना बिउगु दु ।

अथे थौं बन्द आह्वान याःगुलिं मध्य व सुदूरपश्चिमया जनजीवन प्रभावित जूगु दु। अन बजाः, यातायात, कल कारखाना नापं शिक्षण संस्था तकं बन्द जूगु दु। छखे अथे आन्दोलन न्ह्याकीगु मेखे पुलांम्ह जुजु ज्ञानेन्द्र धार्मिक व सांस्कृतिक ख्यलय् सक्रिय जुइगु नापं काली बाबा हिन्दू राज्य हे घोषणा यायेमाः धकाः होम यानाः राजनीतिक दलया नेतात नापलाना जुइगु धइगु आःया अवस्थाय् अर्थपूर्ण जुया वल धकाः मनूतय्सं धयाहःगु दु ।