जनकपुर थौं सुथंनिसें हानं तनावग्रस्त

येँ (सन्ध्या टाइम्स)/बलात्कार याःम्ह प्रहरीयात कारबाही यायेमाःगु माग यासें म्हिगः जूगु प्रदर्शनय् प्रहरीं बल प्रयोग यानाः हस्तक्षेप याःबलय् घाःपाः जूपिंत वासः यायेमाःगु माग यासें थौं जनकपुरय् हानं प्रदर्शन शुरु जूगु दु ।

अनया स्टेशन एरियाय् स्थानीय मनूतय्सं थौं सुथंनिसें थाय् थासय् टायर च्याकाः प्रदर्शन यानाच्वंगु दु। भारतया मधुबनपाखें इहिपाया निंतिं जनकपुर वःम्ह निम्ह तिपू मध्ये मिजंम्हेसित छगू क्वथाय् कुनाः मिसायात स्टेशन एरियाया प्रहरीतय्सं चौकीइ हे यंकाः सामूहिक बलात्कार याःगु घटना सार्वजनिक जुइवं म्हिगः न्हिछि हे उगु घटनाया विरोधय् स्थानीय मनूतयसं प्रदर्शन याःगु खः। उगु प्रदर्शनय् प्रहरीं गोलीं तकं कयेकूगु खः। गोलीं कयाः न्याम्ह मनू घाःपाः जूगु दु। तच्वकं घाःपाः जूपिं निम्हेसित वासः यायेत येँय् हःगु दु। उगु घटनाय् स्वापू दुम्ह प्रहरीयात गृह मन्त्रालयपाखें निलम्बन यायेधुंकूगु दु ।