टेलिकमया साधारण सभा पनेत माग
येँ (सन्ध्या टाइम्स)/नेपाल टेलिकमया साधारण सभा दिकेत टेलिकम शेयर सरोकार समुहं माग याःगु दु। टेलिकमया साधारण सभा ग्व हे वइगु चैत्र १६ गते जुइत्यंगु दु
।
समुहपाखें थन ग्वसाः ग्वःगु छगू छगू अन्तर्क्रिया ज्याझ्वलय् टेलिकमया साधारण सभा दिकेत माग याःगु खः। टेलिकमया प्रिमियम शेयर प्रति कित्ता खुसः निसें नीन्यासः तका पुलाः न्याःपिं दुगु खःसा आः वयाः उमिसं थःपिनिगु लगानी दुबे जुइगु अवस्थाय् थ्यंगु द्वपं शेयर सरोकार समुहं बिउगु दु ।
शेयर सरोकार समुहया छम्ह पदाधिकारीया कथं साधारण शेयरधनीतय्त छगू कित्ता शेयर बराबर न्यागू कित्ता बोनस शेयर व निगू कित्ता हकप्रद शेयर सछि तकां बीगु माःगु माग दु। उम्ह पदाधिकारीं सछि तका वंगु शेयर खुसः तकां न्याके बियाः टेलिकमं सर्वसाधारणया लगानीया डुबे जुइगु अवस्थाय् थ्यंकूगु द्वपं बिउगु दु। टेलिकमया शेयरय् लगानी याःगु सर्वसाधारणया शेयर डुबे जुइगु अवस्थाय् थ्यंगुलिं थुकिया जिम्मेवारी सरकारं कायेमाःगु नं उम्ह पदाधिकारीं धाःगु दु ।
समुहया हे मेम्ह छम्ह पदाधिकारीं स्वदेशी व विदेशी शेयर माफियातय् कारणं टेलिकमया शेयर भाः कुहां वःगु दावी यासे थःपिनिगु माग पूवंकेगु निंतिं दबाव बीमाःगु खँ धाःगु दु। बोनस व हकप्रद शेयर मी ल्यं दनिगु शेयर मिलान यानाः सछि तकाया भावं कूल शेयर संख्याय् अप्वः मयासे शेयर वितरण यायेमाःगु नं उम्ह पदाधिकारीं धाःगु दु ।
टेलिकमं ०६४ सालय् सर्वसाधारणया निंतिं प्रति कित्ता शेयर खुसः तका दामं निष्काशन याःगु खःसा टेलिकमया हे कर्मचारीतय् निंति ग्वीतका दामं बिउगु खः। समुहया कथं सर्वसाधारणं खुसः निसें नीन्यासः तक पुलाः शेयर न्याना काःगु खः ।
