भाजपाया नेता सिंह व प्रम दथुइ खँल्हाबंला
पुलांम्ह प्रधानमन्त्री गिरिजाप्रसाद कोइरालायात अन्तिम श्रद्धाञ्जली बीझाम्ह भारतीय जनता पार्टी (भाजपा)या पुलांम्ह अध्यक्ष राजनाथ सिंहं प्रधानमन्त्री माधवकुरमा नेपाल नाप खँल्हाबंला यानादीगु दु ।
सोमवाः प्रधानमन्त्री निवास बालुवाटारय् जूगु खँल्हाबंलाय् भारतीय नेता सिंहं मदुम्ह कोइराला निगू देय् व देय्या जनताया दथुइया स्वापूयात उचाइ बी सक्षम नेता जूगु धयादिसें वय्क मदयाः नेपालं छम्ह अनुभवी राजनीतिज्ञ तंकूगु जक मखसें भारत व भाजपां नं छम्ह बांलाम्ह पासा तंकेमाःगु धयादिल ।
भाजपा नेता सिंहं कोइरालाया अभावय् नं नेपाःया शान्ति, स्थायित्व व न्हूगु संविधान जारी यायेगु प्रकृया पूवनीगु धयादिसें दक्वं दलया दथुइ याकनं हे सहमति व एकता कायम जुइगु विश्वास प्वंकादिल ।
उगु इलय् प्रधानमन्त्री नेपालं कोइराला मदयाः नेपाःया निंतिं अपूरणीय क्षति जूगु धयादिसें वय्कया अनुपस्थितिइ नं शान्ति प्रकृयायात सार्थक निष्कर्षय् थ्यंकाः संविधान निर्माण यायेगु प्रतिबद्धता प्वंकादिल । वय्कलं दक्वं दलया दथुइ सहकार्य व सहमति जरुरी जूगु धयादिसें थम्हं उकीया निंतिं अधिकतम् कुतः यायेगु धयादिल ।
