थौं नं जनकपुर तनावग्रस्त
थीथी राजनीतिक दल सम्बद्ध कार्यकर्ता व सर्वसाधारणतय्सं दोषी सुरक्षा अधिकारीयात कारवाही यायेमाःगु माग यासें सोमवाः सुथंनिसें प्रदर्शन याःगु दु ।
भौतिक योजना व निर्माण राज्यन्त्री संजयकुमार साहयात दुर्व्यवहार याम्ह प्रहरीयात कारवाही यायेमाःगु, मिसायात बलात्कार याम्ह प्रहरीयात प्रहरीं संरक्षण बियातःगु व आइतवाः सर्वसाधारण व संचारकर्मीयात प्रहरीं लाठीचार्ज याःगु धासें प्रदर्शनकारीतय्सं सुथंनिसें विरोध प्रदर्शनय् कुहांवःगु खः ।
प्रदर्शनकारीतय्सं सुथंनिसें थीथी थासय् टायर च्याकाः प्रर्दशन यानाच्वंगु दुसाः प्रहरीं प्रदर्शनकारीयात तितरवितर यायेत छगू राउण्ड हवाई फायर तकं याःगु दु । अथेहे प्रदर्शनकारी व प्रहरी दथुइ रेल्वे स्टेशन प्रहरी चौकी न्ह्यने ल्वापू जूगु दु । ल्वापूया झ्वलय् प्रदर्शनकारीतय्सं अप्पां क्येकूगु खःसा प्रहरीं लाठीचार्ज यायेगु नापं अश्रुग्यास क्येकूगु खः । उगु घटनाय् छगू दर्जन स्वयां अप्वः प्रदर्शनकारीत घाःपाः जूगु दु ।
थ्वहे दथुइ आइतवाः जनकपुरय् च्वंगु सर्वदलीय बैठकं गृहमन्त्रीया राजिनामा, प्रमुख जिल्ला अधिकारी वेदवहादुर कार्कीयात निलम्बन, प्रहरी उपरीक्षक श्याम खड्का, प्रहरी निरीक्षक आभुषण तिम्लिसिना व बलात्कारया द्वपं लाम्ह प्रहरी नायव निरीक्षक बाबुराम झायात वर्खास्त यानाः कानुनी कारवाही यायेत माग याःगु दु ।
