बस दुर्घटनाय् छम्ह सित, झिंन्याम्ह घाःपाः
मोटरसाइकलया ठक्करय् लाना छम्ह यात्रु बेपत्ता
सोमवाः सुथय् लुम्बिनी पाखें भैरहवा वनाच्वंगु छगः यात्रुबहाक बस भैरहवा-लुम्बिनी सतक खण्डय् लाःगु रामवापुरय् दुर्घटना जुयाः छम्ह यात्रु सीगु दुसाः झिंन्याम्ह घाःपाः जूगु दु । लु. १. ख. ११८१ नम्बरया उगु बस ब्रकफेल जुयाः सतकय् फाटापुला दुर्घटना जूगु खँ प्रहरीं धाःगु दु ।
दुर्घटनाय् लाना रुपन्देही मसीना गाविस-९या छोटक लोध सीगु दुसाः घाःपाः जूपिं मध्ये तेनुहवा गाविसया सनाउल्लाह मुशलवानया अवस्था चिन्ताजनक जूगु खँ धाःगु दु । घाःपाः जूपिं दक्वंसित वास: याकेगु निंतिं प्रहरीया गाडीइ तयाः भैरहवालय् च्वंगु युनिभर्स शिक्षण अस्पतालय् यंकूगु खः ।
उखे नारायणगढ-मुग्लिङ सतक खण्डय् सोमवाः सुथय् मोटरसाइकलं छम्ह लँजुवाःयात ठक्कर नकूवलय् उम्ह लँजुवाः त्रिशुलीइ कुतुंवनाः बेपत्ता जूगु दु । नारायणगढ पाखें येँय् वयाच्वंगु बा. ३३. प. ५००४ नम्बरया मोटरसाइकलया ठक्करय् लाना येँया कोटेश्वर छेँ जूम्ह एस प्रधान बेपत्ता जूगु खँ मुग्लिन प्रहरीं धाःगु दु ।
दुर्घटनाय् लाना धरान छेँ जूम्ह नीप्यदँया रबिन राई समान्य घाःपाः जूगु दुसाः घाःपाः जुम्ह राई व मोटरसाइकलयात मुग्लिन प्रहरीं नियन्त्रणय् काःगु दु । बेपत्ता प्रधानयात मालेगु ज्या जुयाच्वंगु खँ प्रहरीं धाःगु दु ।
