कोइरालाया अन्तिम संस्कार
नेपाली कांग्रेसया सभापति नापं पुलांम्ह प्रधानमन्त्री गिरिजाप्रसाद कोइरलाया आइतवाः बहनी अन्तिम संस्कार याःगु दु । वय्कया सीम्हय् वय्कया म्ह्याय् सुजाता कोइरालां मि तयादीगु खः । येँया पशुपति आर्यघाटय् जूगु अन्तिम संस्कारय् म्ह्याय् सुजातां बहनी ७:४७ इलय् मि तयादीगु खः । अन वय्कयात नेपाली सेनां राष्ट्रिय सम्मान सहित सलामी अर्पण याःगु खः ।
मदुम्ह कोइराला प्रति अन्तिम श्रद्धाञ्जली देछायेत प्रधानमन्त्री माधवकुमार नेपाल, उपप्रधानमन्त्री विजयकुमार गच्छदार, सरकारया वरिष्ठ मन्त्रीत, संविधानसभा अध्यक्ष सुवासचन्द्र नेम्वाङ लगायत कांग्रेसया कार्यवहाक सभापति सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल, पुलांम्ह प्रधानमन्त्री सूर्यबहादुर थापा, कुटनीतिक नियोगया प्रमुखत नापं आपालं सर्वसाधारणत आर्यघाट थ्यंकूगु खः । अथेहे भारतीय मन्त्रीत व नेतात नं अन्तिक संस्कारया इलय् अन उपस्थित जुयादीगु खः ।
पशुपति आर्यघाटय् यंके न्ह्यः कोइरालाया सीम्ह दशरथ रंगशालाय् तयातःगु खः । सुथय् गुताः इलं निसें न्हिनय् स्वताः इलय् तक रंगशालाय् श्रद्धाञ्जलीया निंतिं तयेवं स्वताः इलय् शवयात्रा न्ह्याःगु खः । रंगशालां न्ह्याःगु शवयात्रा लुँहिति, न्हू सतक, रत्नपार्क, बागबजाः, मैतिदेवी, पुलांगु बानेश्वर, बत्तिसपुतली, गौशाला जुयाः पशुपति आर्यघाट यंकूगु खः ।
शवयात्राय् मन्त्रीत नापं थीथी राजनीतिक दलया नेता-कार्यकर्ता व द्वलंद्वं आम नागरिकया ब्वति दुगु खः ।
