आः शान्ति प्रक्रिया छु जुइ?
येँ (सन्ध्या टाइम्स)/ नेपाली कांग्रेसया सभापति गिरिजाप्रसाद कोइराला मदये धुंकाः आः कांग्रेसया नेतृत्व सुनां याइ धइगु न्ह्यसः ला पिहां वःगु हे जुल, व स्वयाः नं अहम् जुयाः पिहां वयाच्वंगु न्ह्यसः धाःसा मेगु हे दु - देय्या शान्ति प्रक्रिया आः छु जुइ? कोइरालाया निधनं देय्या शान्ति प्रक्रिया प्रभावित जुइ? राजनीतिक ख्यलय् आः थ्व न्ह्यसलं सकस्यां सातो कयाच्वंगु दु ।
माओवादीया सचिव पोष्टबहादुर बोगतीं ला शान्ति प्रक्रियाय् लिच्वः लाइ धया हे दीधुंकूगु दु। नेपाःया वर्तमान शान्ति प्रक्रियाया सूत्रधार हे कोइराला जूगु कारणं वय्कः मदयेवं थ्व प्रक्रिया प्रभावित जुइ धइगु वय्कःया धापू खः। माओवादीया मेपिं नेतातय्सं अज्याःगु धापू ला बिउगु मदु तर वय्कःपिनि खँपुइ शान्ति प्रक्रिया संकटय् लाइगु खः लाकि धइगु आशंका धाःसा गाक्क हे सुलाच्वंगु खंकेफु ।
नेपाली कांग्रेस दुने माओवादीयात धाथें थूम्ह व माओवादीं नं पत्याः याःम्ह नेता धइम्ह कोइराला हे छम्ह जक खः। कोइराला बाहेक मेपिं नेतातलिसे माओवादीया उलि सुमधुर स्वापू मदु। उकिं कोइराला मदयेधुंकाः वय्कःलिसे माओवादीं न्हापा ब्याकातःगु यावत बिचाःत आः छु जुइ धाये मफइगु अवस्थाय् लाःगु दु ।
कोइराला मदयेधुंकाः आः कांग्रेसया सुं नं नेतां शान्ति प्रक्रियाय् तुरुन्त ध्यान बी फइगु अवस्था मदु। छाय्धाःसां आः कांग्रेस दुने अन्य खँयात सिबें नं नेतृत्व ल्हातय् लाकेगु खँय् निं निगूगु पुस्ता केन्द्रित जुइफु। कोइरालां थः धुंकाः थ्वहे नेता जुइ धकाः संकेत तक नं बिया मथकूगु कारणं आः थीथी गुट दयेकाः च्वनाच्वंपिं निगूगु पुस्ताया नेतात नेतृत्व ल्हातय् लाकेत सक्रिय जुइगु खँय् शंका मदु। यदि कांग्रेसया थ्व नेतृत्व विवाद याउँक मज्यन, प्रक्रिया ताःहाकः जुयाच्वन, मेगु कथंया विवाद ब्वलन वा अनुदारवादी नेताया ल्हातय् लाः वन धाःसां नं शान्ति प्रक्रियाया भविष्य अनिश्चित जुइफु ।
मेगु ला छु, एमाले नेता माधव नेपालया नेतृत्वय् दुगु वर्तमान सरकार तकं कोइरालां दयेका बिउगु खः। कोइराला मदयेधुंकाः वइगु मेगु नेतृत्वं थ्व सरकारयात गय् यानाः स्वइ धइगु तक नं शंका पिहां वयेधुंकूगु दु ।
