चिली व हाइटीइ ब्वःगु भुखाय्या फरक
येँ (सन्ध्या टाइम्स)/दक्षिण अमेरिकी देय् चिलीइ उकुन्हु तःभुखाय् ब्वःबलय् म्हो जक मनू सित तर अज्याःगु हे भुखाय् हाइटीइ ब्वःबलय् यक्व मनू सित। छाय् अथे जूगु जुइ धइगु खँय् अध्ययन यानाच्वंपिं अमेरिकी अनुसन्धातातय्सं थःपिनि प्रारम्भिक रिपोर्ट सार्वजनिक याःगु दु ।
उमिगु अध्ययन रिपोर्ट कथं चिलीइ म्हो जक मनू सीगुया खास यानाः निता कारण दु। छता, चिलीया मनूत भुखाय् बारे यक्व हे जानकारी दुपिं लानाच्वन। भुखाय् ब्वल धाःसा छु याये माली व गय् यानाः बचे जुइगु धइगु बारे उमिके यक्व जानकारी दु। अथे हे मेता कारण धइगु चिलीइ छक्वलं भुखाय् मब्वसे बिस्तारै कम्पन जुया वःगु जुयाच्वन गुकिं यानाः मनूत सुरक्षित थासय् बिसिउँ वनेत यक्व हे ई दत।
हाइटीइ धाःसा थ्व निगुलिं अवस्थाया अभाव जुल गुकिं यानाः अन अनुमान याःगु स्वयां नं अप्वः मनूतय् ज्यान वल। चिलीया भुखाचय् लानाः न्याद्वः जक मनू सीगु खःसा हाइटीइ निगू लाखा स्वीद्वः मनू सीधुंकूगु खँ धाःगु दु ।
