कोइराला प्रति नेतातय्सं बिचा: हायेकल
भारतीय राष्ट्रपति व प्रधानमन्त्री पाखें नं सम्वेदना
पुलाम्ह प्रधानमन्त्री नापं नेपाली कांग्रेसया सभापति गिरिजाप्रसाद कोइराला मदुगु प्रति राष्ट्रपति, प्रधानमन्त्री नापं राजनीतिक दनया नेतात नापं थीथी ख्यलं बिचाः हायेकूगु दु ।
शनिवाः न्हिनय् मदुम्ह कोइरालायात श्रद्धाञ्जली बियादिसें राष्ट्रपति डा. रामवरण यादवं कोइराला लोकतान्त्रिक आन्दोलनया योद्धा जूगु धयादिसें वय्कया अभावं देय्यात तःधंगु क्षति जूगु धयादिल ।
अथेहे प्रधानमन्त्री माधवकुमार नेपालं नेपाःया राजनीतिया महान हस्ती नपां देय्या राजनीतिकर्मीतय् अभिभावक कथं जुयादीम्ह कोइराला मदुगुलिं देशय् अपूरणीय क्षति जूगु धयादिल ।
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' शान्ति व संविधान निर्माण प्रक्रियाया छम्ह प्रमुख सर्जक व स्तम्भ मदुगुलिं स्तब्ध जूगु धयादिसें शान्ति व संविधान निर्माण प्रक्रियायात निष्कर्षय् थ्यंकाः न्हूगु व समृद्ध नेपाःया विकासय् न्ह्याः वनेगु हे कोइराला प्रतिया सच्चा श्रद्धाञ्जली जुइगु धयादिल ।
नेकपा (एमाले)या अध्यक्ष झलनाथ खनालं कोइरालाया अभाव नेपाली राजनीतिइ जुइगु धयादिसें वय्क मदुगु प्रति सम्वेदना प्वंकादिल । अथेहे राष्ट्रिय जनशक्ति प्रजातन्त्र पार्टीया अध्यक्ष सुर्यबहादुर थापां नेपाःया राजनीतिया महान नेता मदुगु प्रति दुःख प्वंकादीसें वय्कया अभाव नेपाःया राजनीतिइ ताः ई तक जुइगु धयादिल ।
अथेहे पुलांम्ह प्रधानमन्त्री नापं कांग्रेसया संस्थापक दुजः कृष्णप्रसाद भट्टराईं कोइराला मदुगुलिं दय्यात अपुरणीय क्षति जूगु धयादिसें कोइराला मदुगु खबरं थः मर्माहित जूगु धयादिल ।
उखे कोइराला मदुगु प्रति नेपाल उद्योग वाणिज्य महासंघ, नेपाल चिकित्सक संघ, नेपाल नागरिक समाज, सम्पादक समाज नेपाल, नेपाल पत्रकार महासंघ लगायत थीथी संघ संस्थातय्सं नं छगू विज्ञप्ति पिथना कोइराला प्रति बिचाः हायेकूगु दु ।
भारतीय राष्ट्रपति व प्रधानमन्त्री पाखें नं सम्वेदना
थ्वहे दथुइ भारतीय राष्ट्रपति प्रतिभा पाटिल व प्रधानमन्त्री मनमोहन सिंह नं बिस्कं बिस्कं विज्ञप्ति पिथना कांग्रेस सभापति कोइराला मदुगु प्रति बिचाय् हायेकूगु दु । विज्ञप्तिइ नेपाःया उच्च राजनीतिक नेता कोइरालां नेपाःया लोकतन्त्रिक आन्दोलनयात निरन्तर नेतृत्व यानाः आन्दोलनयात सफल याःगु खँ न्ह्यथंसें कोइरालाया बिचालं नेपाःया राजनीति छगू ठोस निष्कर्षय् थ्यंकूगु खँ न्ह्यथंनातःगु दु ।
