भक्तिदासजुयात लुमंकेबलय्...

नरेशवीर शाक्य

थौं झिंस्वन्हु

नेवाःतय्गु राष्ट्रिय संगठन नेवाः देय् दबूया नां न्ह्यथनेगु इलय् नापं लुमनीगु मेगु नां खः भक्तिदास श्रेष्ठ। नेवाः देय् दबूया न्हापांम्ह नायः व नेवाःतय्गु राष्ट्रिय संगठनयात मूर्तरुप बीगु निंतिं वय्कलं आपालं योगदान यानादीगु दु ।

नेपालभाषा मंकाः खलःया निक्वःगु मुँज्यां देय्न्यंकया नेवाःतय्त छथासं तयेगु निंतिं छगू राष्ट्रिय संगठनया आवश्यकता वाःचायेकाः थ्व ज्या न्ह्याकूगु खः। मंकाः खलकं नेवाःतय्गु म्हसीका व अधिकारया निंतिं म्हिताच्वंगु भूमिकायात ध्यानय् तयाः मंकाः खलः हे केन्द्रीय संस्था कथं विस्तारित यायेमाःगु सः थ्वयाच्वंगु खः। देय्या तत्कालिन नीतिं नेवाःतय्त भाषा जातिया खँय् उत्पीडनय् लाकाच्वंगु कारणं नं थुकिया आवश्यकता झन हे महसूस जुयावःगु खः। नेवाःतय्गु राष्ट्रिय संस्था नीस्वनेगु निंतिं न्हापां नेवाःतय्गु छगू राष्ट्रिय बिचार गोष्ठी यायेगु व देय्न्यंकंया नेवाःतय्गु क्वःछिनाकथं नेवाः राष्ट्रिय संगठन नीस्वनेगु खँ जूगु खः। थुगु संस्थां नेवाःतय्गु भाषा, संस्कृतिया लिधंसाय् सकल नेवाःतय्त छथाय् तयाः समस्त नेवाःतय्गु हक अधिकार सुनिश्चित यायेगु तातुनाः थुकिया नेतृत्व यायेगु निंतिं छम्ह प्रतिष्ठित, राजनीतिं पिनेयाम्ह जुल धाःसा सकल नेवाःतय्सं स्वीकार याइ धइगु मान्यताकथं खँ जूबलय् नेपाःया छम्ह प्रतिष्ठित उद्योगपति भक्तिदास श्रेष्ठ कजि कथं न्ह्यचिलादीगु खः। वय्कःया नेतृत्वय् बिचार गोष्ठी सफलकथं क्वचायाः वय्कःया हे नेतृत्वय् नेवाःतय्गु राष्ट्रिय संगठन नेवाः देय् दबू गठन जूगु खः। देय्न्यंकंया नेवाःतय्सं वय्कःयात सर्वसम्मतं नायः ल्ययाः देय्या कुंकुलामय् नेवाःतय्गु संगठन विकास याःगु खः। वय्कलं देय् दबू न्ह्याकेगु झ्वलय् जुइगु छुं नं निर्णय सर्वसम्मतं जुइमाःगु मान्यता ब्वलंकाः ५५ जिल्लाय् संगठन विकास यायेत ताःलाकादिल। थ्यंमथ्यं न्हय्दँ तक नेवाः देय् दबूया नेतृत्व यानाः अनं लिपा सल्लाहकारया भूमिका म्हिताः देय् दबूयात गतिशील यानादिल ।

नेवाः देय् दबुलिं सक्रिय राजनीति यायेगु स्वयां नं देश विदेशया नेवाःतय्त भाषा व संस्कृतिया माध्यमं छप्पँ यायेमाः धइगु वय्कःया मान्यता खः। वय्कःया कार्यकाल थ्वहे मान्यता ज्वनाः देय् दबू न्ह्यात। वय्कः स्वास्थ्यया कारणं छेँनं पिहां मवःगु तःदँ दयेधुंकूसां नेवाः देय् दबूया गतिविधि धाःसा न्ह्याबलें स्वयेगु यानादी। थःगु नेतृत्वय् शुरु जूगु देय् दबूया गतिविधिं नेवाःतय्त गलत सन्देश मवयेमा धकाः न्ह्याबलें सचेत जुयादी ।

More Stories Like this