बजारय् ध्यबा मदयाः बैंकत वाथावाथा
येँ (सन्ध्या टाइम्स)/देय्या मौद्रिक नीति दयेकीगु निकाय नेपाल राष्ट्र बैंकया गभर्नर नियुक्त यायेगु खँय् सत्तारुढ दलतय् खिंचातानी जुयाच्वंगु इलय् उखे बजारय् ध्यबा मदयाः देय्या बैंकत धाःसा वाथावाथा कनाच्वंगु दु। थज्याःगु अवस्थाय् छु यायेगु धकाः निर्णय यायेत राष्ट्र बैंकय् गभर्नर तकं मदुगुलिं समस्या झन् जटिल जुयाच्वंगु खँ सम्बन्धित बैंकतय्सं धाःगु दु ।
बैंकतय्सं जग्गाय् लगानी यायेगु म्हो या धकाः राष्ट्र बैंकं निर्देशन बीवं अज्याःथाय् जुयाच्वंगु लगानी म्हो जूगु दु। तर उकिया विकल्पय् आः मेगु गन लगानी यायेगु धकाः नं निजी बैंकतय्सं निर्णय याये फयाच्वंगु मदु। देय्या उद्योग व्यवसाय ध्वस्त जुयाच्वंगुलिं लगानी यायेगु थाय् हे मदयाच्वंगु दु। तर थथे लगानी यायेगु थाय् मदयाच्वंगु इलय् नं बजारय् ध्यबाया धाःसा तःधंगु अभाव जुयाच्वंगु दु ।
थज्याःगु अवस्थाय् आः राष्ट्र बैंकं हे दत्यांनिसें निदँ तकया निंतिं ४०-५० अर्ब ति दां बैंकतय्त त्यासा बियाः कारोवार याकेमाःगु सुझाव निजी बैंकतय्सं बियाच्वंगु दु। राष्ट्र बैंकं धाःसा आः नकतिनि २० अर्ब ति दां उकथं बजारय् त्वःतेधुंकूगु दु ।
थ्वहे झ्वलय् अर्थमन्त्री सुरेन्द्र पाण्डें बजारय् ध्यबाया अभाव जुयाच्वंगु थ्व अवस्थाया दोष सहकारी संस्थातय्त बियादीगु दु। थौंकन्हय् बैंकिंग कारोवार समेत यानाच्वंपिं सहकारी संस्थातय्सं करोडौं तका दां होल्ड यानाः आर्थिक समस्या पिकयाच्वंगु खँ वय्कलं धयादीगु दु ।
