एमाले व कांग्रेस दथुइ भागबण्डा मिलेजुल
सत्तारुढ नेकपा (एमाले) व नेपाली कांग्रेस दथुइ थीथी संवैधानिक निकायलय् भाडबण्डा बारे अन्ततः सहमति जूगु दु । निगू दल दथुइ जूगु सहमति कथं नेपाल राष्ट्र बैंकया गर्भनरय् युवाराज खतिवडा, राष्ट्रिय योजना आयोगय् जगदीश चन्द्र पोखरेल व गरिवी निवारण कोषया उपाध्यक्षय् विद्याधर मल्लिकयात नियुक्ति यायेत सहमति जूगु दु ।
प्रधानमन्त्री माधवकुमार नेपाल सहित कांग्रेस व एमालेया नेतात दथुइ शुक्रवाः जूगु बैठकय् कांग्रेसं आयोगय् पोखरेल व कोषय् मल्लिकयात नियुक्ति यायेगु प्रस्ताव तयेवं सहमति जूगु खः । थ्वस्वयां न्ह्यः कांग्रेस पदाधिकारीतय् शुक्रवाः च्वंगु बैठकं पोखरेल व मल्लिकयात नियुक्तिया प्रस्ताव यायेगु निर्णय याःगु खः ।
गर्भनर पदय् नियुक्ति यायेगु सहमति जुम्ह एमाले कोटा याम्ह खतिवडा राष्ट्रिय योजन आयोगया उपाध्यक्ष खःसा कांग्रेस कोटाया पोखरेल आयोगया हे पुलांम्ह उपाध्यक्ष व मल्लिक पुलांम्ह अर्थ सचिव खः ।
ताः ई न्ह्यः निसें निगू दल दथुइ संवैधानिक निकायलय् भागबण्डा मिलेमजुइवं तक्वः हे मन्त्रिपरिषद्या बैठक स्थगित यायेमाःगु खः । शुक्रवाः सुथय् च्वनीगु धाःगु बैठक नं बागबण्डालय् सहमति मजुइवं स्थगित यायेमाःगु खः । निगू दल दथुइ सहमति लिपाः शुक्रवाः न्हिनय् च्वनीगु मन्त्रिपरिषद्या बैठकं नेपाल राष्ट्र बैंकया गर्भनर लगायत संवैधानिक निकायलय् नियुक्तिया निर्णय याइगु जूगु दु ।
