'सहमति कथं न्हूगु सरकार गठन बारे सहलह जुयाच्वंगु दु'
एकीकृत नेकपा (माओवादी)या उपध्यक्ष डा. बाबुराम भट्टराईं सहमति कथं हे माओवादी नेतृत्वया राष्ट्रिय सहमितया सरकार गठन यायेगु बारे सहलह जुयाच्वंगु खँ धयादीगु दु । वय्कलं सहमति कथं सरकार गठन यायेमफुसाः अविश्वासया प्रस्ताव ह्येफइगु धयादिल ।
बिहीवाः सिरहाया मिर्चैयालय् जुइगु ज्याझ्वलय् ब्वति कायेत जनकपुर थ्यंकादीम्ह भट्टराईं संचारकर्मीत नाप खँल्हाबंला यानादिसें माओवादी नेतृत्वया राष्ट्रिय सरकार गठन मजूतल्ले संविधान निर्माण जुइमफइगु दावी यानादिल । वय्कलं जनता पाखें तिरष्कृतया नेतृत्वय् गठन जूगु सरकार प्रति जनताया विश्वास मदुगु धयादिल ।
अथेहे वय्कलं सरकार व सत्ताधारी दलया नेतातय् अक्रमणया कारणं देशय् अराजकता व हत्या-हिंसा अप्वयाच्वंगु द्वपं बियादिल । वय्कलं नेपाली कांग्रेसया सभापति गिरिजाप्रसाद कोइरालां थः नाप नं माओवादी दकलय् तःधंगु दल जूगुलिं तःधंगु जिम्मेवारी बहन यायेत इनाप यानादीगु कनादिल ।
