कोइरालाया स्वास्थ्य अवस्था हानं स्यन

छुं दिं न्ह्यः जक अस्पतालं डिस्चार्ज जुयादीम्ह नेपाली कांग्रेसया सभापति गिरिजाप्रसाद कोइरालाया स्वास्थ्य अवस्था हानं स्यंगु दु । छातीइ समस्या अप्वयेवं बिहीवाः डाकटरतय्सं वय्कया स्वास्थ्य अवस्था जाँच याःगु खः । अस्पतालय् दइगु सुविधा छेँय् हे दुगुलिं वय्कयात अस्पतालय् यंकेम्वाःगु खँ धाःगु दु । शुक्रवाः सुथय् नं डाकटरतय्सं कोइरालाया स्वास्थ्य परिक्षण याःगु खः ।

वंगु आइतवाः सहिद गंगालाल हृदय केन्द्रय् भर्ना जुयादीम्ह कोइरालाया स्वास्थ्य अवस्थाय् सुधार जुइवं बुधवाः वय्कयात डिस्चार्ज याःगु खः । बिहीवाः सनिलय् तक सामान्य खँल्हाबंला यायेफुम्ह कोइरालाया स्वास्थ्य अवस्थ बहनी निसें कमजोर जूगु खः ।