१२० घण्टे धर्ना क्वचाल / आः संविधानसभा भवनयात प्यखेरं घेरे याइगु
इलय् हे संविधान निर्माण यायेमाःगु माग सहित शान्ति व लोकतन्त्रया निंतिं नागरिक आन्दोलनं न्यान्हू न्ह्य: निसें बियाच्वंगु नागरिक धर्ना शुक्रवाः क्वचाःगु दु । नागरिक अगुवातय्सं संविधान निर्माण यायेगु ज्याय् गम्भीर जुइत नेतातय्त दवाब बीगु कथं न्हू बानेश्वरय् च्वंगु संविधानसभा भवन न्ह्यने १२० घण्टे धर्ना ब्यूगु खः ।
शुक्रवाः छगू ज्याझ्वः यासें नागरिक धर्ना क्वचायेकूगु खः । उगु इलय् नागरिक अगुवातय्सं सभासद्त संविधान निर्माण यायेगु ज्या त्वःताः छगू नं कथंया ज्याझ्वलय् ब्वति काःसाः अनं हे लितछ्वयाबीत दक्वं नागरिकतय्त इनाप याःगु दु ।
नागरिक धर्नाय् थीथी जिल्लाया नागरिक अगुवा, जनजाति, दलित, मधेशी समुदायया प्रतिनिधि, थीथी संघ संस्थाया प्रतिनिधितय्सं ब्वति काःगु खः । १२० घण्टे नागरिक आन्दोलनं मेगू दवाब बीगु ज्याझ्वः याकनं यायेगु खँ धाःगु दु । आः न्हूगु दवाब ज्याझ्वः कथं संविधानसभा भवनयात प्यखेरं घेरे याइगु खँ धाःगु दु ।
