अन्तिम इलय् मन्त्रिपरिषद्या बैठक स्थगित
राष्ट्र बैंकया गर्भनर व मिसिन रिडेवल पासपोर्ट (एमआरपी) सम्बन्धी निर्णय यायेत बिहीवाः सःतुगु मन्त्रिपरिषदया बैठक अन्तिम इलय् स्थगित जूगु दु । बैठकया निंतिं दक्वं मन्त्रीत प्रधानमन्त्रीया ज्याकू थ्यंकेधुंकाः एमाले व कांग्रेस दथुइ संवैधानिक समितिलय् भागबण्डा मिलेमजुइवं बैठक स्थगित याःगु खः ।
मन्त्रिपरिषद्या बैठक च्वने स्वयां न्ह्यः राष्ट्र बैंकया गभर्नर पदय् सहमति यायेत च्वंगु एमाले व कांग्रेस दथुइया बैठकं उगु पदय् एमालेया कोटा याम्ह राष्ट्रिय योजना आयोगया उपाध्यक्ष डा. युवराज खतिवडाया नांमय् कांग्रेसं सहमति प्वंकूगु खः । तर मन्त्री परिषद्या बैठक न्ह्याये न्ह्यः कांग्रेसं दक्वं संवैधानिक समितिलय् प्याकेजय् नियुक्ति जुइमाःगु धायेवं बैठक स्थगित जूगु खः ।
थ्वस्वयां न्ह्यः माघ १७ गते पुलाम्ह गर्भनर विजयनाथ भट्टराईया कार्यकाल फुइवं खाली जुयाच्वंगु गर्भनर पदय् आ: तक नियुक्ति जुइमफुगु खः । एमालें वित्तिय संकटया इलय् मौद्रिक अर्थशास्त्री खतिवडायात केन्द्रीय बैंकय् नियुक्त यायेमाःगु अडान कायाच्वंगु खःसा कांग्रेसं धाःसाः खतिवडा पार्टीया दुजः जूगुलिं अर्थसचिव रामेश्वर खनाल वा राष्ट्र बैंकया डेपुटी गर्भनर वीरबिक्रम रायमाझीयात नियुक्त यायेमाःगु अडान कयाच्वंगु खः ।
दलतय् दथुइ भागवण्डाय् विवाद जूगुलिं अख्तियार दुरुपयोग अनुसन्धान आयोग, लोकसेवा आयोग, महालेखा परिक्षक लगायत संवैधानिक निकायलय् पदाधिकारीत नियुक्ति जुइमफुनी ।
