राष्ट्रिय सहमतिया सरकार बारे माओवादीं सहलह न्ह्याकल
एकीकृत नेकपा (माओवादीं) वर्तमान माधवकुमार नेपाल सरकारया विरुद्धया अविश्वस प्रस्तावय् ग्वहालि यायेत चीचीधंगु झिंछगू दलयात इनाप याःगु दु ।
माओवादी संसदीय दलया ज्याकूथी बिहीवा: जूगु बैठकय् माओवादीं आःया आवश्यकता राष्ट्रिय सहमतिया सरकार जूगु धासें राष्ट्रिय सहमतिया सरकार निर्माण यायेत ग्वाहालि यायेत इनाप याःगु खः । उगु इलय् चीचीधंगु झिंछगू दलं संविधान निर्माण व शान्ति प्रकृयायात तार्किक निष्कर्षय् थ्यंकेत राष्ट्रिय सहमतिया सरकार निर्माण जुइमाःगु खँय् सहमति प्वंकूसां थुकीया बारे ठोस प्रस्ताव ह्येत माओवादीयात इनाप याःगु खँ नेकपा (माले)या महासचिव सीपि मैनाली कनादिल ।
बैठक लिपाः माओवादी उपाध्यक्ष डा. बाबुराम भट्टराईं राष्ट्रिय सहमतिया सरकारया निंतिं वर्तमान सरकार बाधक जूगुलिं सरकार परिवर्तनया निंतिं माओवादीं सहलह न्ह्याकूगु कनादिल । वय्कलं प्रधानमन्त्री माधवकुमार नेपालं सरकारया नेतृत्व मत्वःतुसाः सरकार विरुद्ध अविश्वासया प्रस्ताव ह्येफइगु नं कनादिल ।
माओवादीं बैठकय् संविधानसभाय् दुथ्याःगु नीन्यागूलिं दलयात ब्वंगु खःसां झिंछगू दलं जक बैठकय् ब्वति काःगु खः ।
