कला, संगीत व सफूया ब्वज्या
नेपालभाषाया संगीत ख्यलय् छुं यायेगु ताः तयाः पलिस्था जूगु मांभाय् धुकू एण्ड ससुद्यः प्रेडक्सन दछि पूवंगु लसताय् कन्हय् विहीवाःनिसें यलया भाष्करवर्ण महाविहार न्याखाचुकय् छगू बिस्कं कथंया ब्वज्या जुइत्यंगु दु। थुकी च्वकिपा, पौभाः, छ्वालि कला लिसें नेवाः भासं पिहां वयाच्वंगु सफू व सीडी नं ब्वयातःगु दइ ।
ब्वज्या स्वन्हुयंकं जुइ। थुकी कलाकारपिं बुद्धरत्न शाक्य, योगेन्द्र शाक्य, भावना पुं, विनय राजोपाध्याय व नेवाः स्यनेकुथिया मस्तय्सं च्वयातःगु कलाया ब्वज्या जुइ।
मांभाय् धुकू एण्ड ससुद्यः प्रोडक्सनपाखें नांजाःम्ह गायक सुलिन्द्र शाक्य (सुलिन) या याकःसः दुगु न्हूगु सीडी 'हुंकन पुखूचाय्' नं पिथनेत्यंगु दु। उगु प्रोडक्सनपाखें छुं ई न्ह्यः तिनि 'संगीत ख्यलय्-निब्व' धकाः छगू सीडी पिकाःगु खः। लिसें प्रोडक्सन पलिस्था जूगु सछिन्हु पूवंगु लसताय् छक्वः व न्हूदँया लसताय् लाकाः छक्वः नं थथे हे नेपालभाषाया सफू व सीडी ब्वज्या यायेधुंकूगु दु। उबलय् नेवाः कलाकारत नापलायेगु व वय्कःपिनि अटोग्राफ कायेगु ह्वःताः नं थुकिं चूलाका बिउगु खः ।
