संक्षिप्त संविधान हयेत नेम्वाङया लबिङ

येँ (सन्ध्या टाइम्स)/गुलि गुलि जेष्ठ १४ गतेया न्हि सतिना वल उलि उलि हे राजनीतिक दलया नेतात नापं सभासदत हथाय् चाइगु स्वाभाविक हे जुल। थ्वहे दथुइ संविधानसभां न्हूगु संविधान दयेकेगु निंतिं धकाः संविधानसभाया मू मू स्वंगू राजनीतिक दलतय्सं उच्चस्तरीय राजनीतिक संयन्त्र दयेकाः गृहकार्य यानाच्वंगु इलय् लाक्क हे संविधानसभाया सभामुख सुवास नेम्वाङं नं थःगु हे कथंया लबिङ शुरु यानाहःगु खँ सीदुगु दु ।

राजनीतिक दलतय्सं संविधान दयेकेत ई मगात धासें संविधानसभाया म्याद मेगु खुला थपे याना वनीगु सम्भावना खने दयेवं दलत फुक्कं असफल जूसां थः सफल जुइगु सूत्र कथं सभामुख नेम्वाङं संक्षिप्त संविधान जूसां जारी याकेगु प्रस्तावया पक्षय् लविङ शुरु यानादीगु खँ सूत्रं धाःगु दु।
संविधानसभाया म्याद मेगु खुला थपे यानाः राज्य पुनर्संरचना आयोगयात प्राविधिक ज्या याकेगु धकाः खँ वयाच्वंसां थज्याःगु प्रस्ताव सुनां तयेगु धइगु खँ धाःसा क्वःमछिनाच्वंगु खँ नं धाःगु दु ।

मेमेगु देशय् नं संक्षिप्त संविधान जारी यायेधुंकाः जक पूर्ण संविधान दयेकूगु उदाहरणत न्ह्यःने तसें सभामुख नेम्बाङं थज्याःगु प्रस्ताव हयादीगु खः ।

यदि पूर्ण संविधान हयेत ई मगाःसा संक्षिप्त संविधान हःसां जिउ धइगु पक्षय् थः दुसां नागरिक समाज नापं बुद्धिजीवीतय्सं धाःसा न्ह्याक्व चीहाकःगु जूसां व पूर्ण संविधान हे जुइमाः, संक्षिप्त संविधानया नामय् गोलमटोल दस्तावेज हल धाःसा उकिं झन् समस्या पिकाइ धकाः खबरदारी याना हःगुलिं सभामुख नेम्वाङयात नं ज्या मछिना वःगु खँ धाःगु दु ।

अथे खःसां संक्षिप्त संविधानया वय्कःया लविङ धाःसा जारी हे दनिगु खँ सूत्रं धाःगु दु ।