स्थानीय निकाय चुनाव बारे सहलह
येँ (सन्ध्या टाइम्स)/प्रम माधव नेपालं म्हिगः सःतूगु सर्वदलीय बैठकय् स्थानीय निकायया चुनाव बारे नं सहलह जुल। संविधानसभाया नीन्यागू दल मध्ये नीनिगू दलं ब्वति काःगु उगु मुँज्याय् स्थानीय निकायया चुनाव बारे थःथःगु पार्टीइ सहलह यानाः मेगु वालय् जुइगु मुँज्यां निर्णय यायेगु सहमति जूगु खः। मुँज्याय् सेना समायोजन, संविधान निर्माण आदि विषयय् सहलह जूगु खः। मुँज्यायात प्रतिपक्ष दल एनेकपा (माओवादीं) बहिस्कार याःगु खः ।
अथे हे म्हिगःया बैठकय् नेपाः राष्ट्रिय पार्टीं नं ब्वति मकाः। बैठकया एजेण्डा स्पष्ट मयाःगु व अविश्वासया प्रस्ताव सामना यायेत बैठक सःतूगु जुयाः बैठकय् थःपिं मवनागु खँ नेपाः पार्टीया अध्यक्ष डा. केशवमान शाक्यं 'सन्ध्या टाइम्स'यात कनादिल ।
