लिपिविज्ञ पं. हेमराज शाक्य मंत
यल (सन्ध्या टाइम्स)/नांजाःम्ह लिपि विशेषज्ञ पं. हेमराज शाक्य मंत। थौं सुथय् ८ बजे थैना त्वालय् च्वंगु थःगु हे छेँय् चःबिइ वंम्ह वय्कः दने मफयेवं छेँजःपिंसं ल्ह्वनाः लासाय् तये हःगु खःसा अन हे वय्कः मदुगु खः। वय्कः ८६ दँ दुम्ह खः। वय्कःयात खास छुं नं कथंया ल्वय् मदुगु खँ वय्कःया छेँजःपिंसं धाःगु दु ।
ने.सं. १०४६ य् जन्म जूम्ह वय्कः यलया नांजाःगु महाबौद्ध देगः निर्माण याःपिं अभयराज शाक्यया पुस्ता खः। नेपाःया फुक्कं मौलिक लिपिया विशेषज्ञ वय्कलं पिकयादीगु 'नेपाल लिपि संग्रह'य थ्व ख्यःया छगू तःजिगु कृति खः ।
वय्कलं २२ दँ तक अध्ययन यानाः च्वयादीगु 'श्री स्वयम्भु महाचैत्य' यात ने.सं. १०९८ व मेगु कृति 'नेपाल संस्कृतिया मूलुखा'यात नेसं १०८८ या श्रेष्ठ सिरपाः बिउगु खः। वय्कःया आः तक करिब ६० गू कृति प्रकाशित जुयाच्वंगु दु ।
नेपाल लिपिया अध्ययन व थुकिया प्रचारय् वय्कःया तःधंगु योगदान दु। वय्कः नेपाल लिपि गुथिया संरक्षक नं खः। नेपाल लिपि व बौद्ध धर्मया अध्ययन अनुसन्धानय् वय्कःयात नेपाःया हे ज्वः मदुम्ह व्यक्तित्वया रुपय् कायेगु याः ।
मदुम्ह पं. शाक्यया कन्हय् सुथय् ११ बजे शवयात्रा यासें थनया बालकुमारी दीपय् अन्तिम संस्कार यायेगु खँ वय्कःया कायभाजु सुरेन्द्र शाक्यं 'सन्ध्या टाइम्स'यात कनादिल। वय्कःया कलाः नापं निम्ह काय व स्वम्ह म्ह्याय् दी ।
