बाबुरामं गयल जूगु ध्यबाः लितबिल
एकीकृत नेकपा (माओवादी)या उपाध्यक्ष डा. बाबुराम भट्टराईं संविधानसभाय् गयल जूगु भत्ता लितब्यूगु दु । भाट्टराईया पाखें वय्कया स्वकीय सचिव विश्वदीप पाण्डें आइतवाः संविधानसभा सचिवालयलय् गयल जूगु दिंया प्यद्वं भत्ता लितब्यूगु खः ।
माओवादी उपाध्यक्ष भट्टराईं आइतवाः छगू विज्ञप्ति पिथनादिसें कात्तिक १० निसें मंसिर १ गते तक थः संविधानसभाय् अनुपस्थित जूगु भत्ता लितबियागु खँ धयादीगु दु । उगु अवधिया दुने नीन्हू न्ह्याःगु संविधानसभाया बैठकया भत्ता लितबियागु खँ विज्ञप्तिइ न्ह्यथंनातःगु दु ।
अथेहे वय्कलं थुकीं सभासद्तय् आचरण शुद्धिलय् ग्वाहालि जुइ धइगु विश्वास प्वंकाच्वनाः धकाः नं धयादीगु दु । नापं लिपा संविधानसभाय् अनुपस्थित जूसाः उकीया पारिश्रमिक पा जुइकथं भुक्तानी बीत नं संविधानसभा सचिवालययात इनाप यानादीगु दु । अथे याःसा जि थंज्याःपिं सभासद्तय् नैतिक न्ह्यसः मवइगु खँ नं विज्ञप्तिइ न्ह्यथंनातःगु दु ।
