ल्वहंहितिं दुरु हाल !
ख्वप (सन्ध्या टाइम्स)/थनया व्यासी त्वालय् च्वंगु दाफा हितिं शुक्रवाः सुथय् आकाझाकां तुयूगु लः पिहां वयेवं स्थानीय मनूत हितिं दुरु पिहां वल धकाः स्वयेत हुल मुंगु दु। ल्वहंहितिं दुरु पिहां वल धकाः गुलिखे मनूत अन घः ज्वनाः काः नं वयाच्वंगु खः ।
गुलिखे मनूतय्सं उकियात दुरु हे खः धकाः कया नं यंकूगु दु। सुथ न्हापां तसकं ताकुक वयाच्वंगु उगु 'दुरु' लिपा जूलिसे छ्वालुया वंगु खँ नं स्थानीय मनूतय्सं धाःगु दु ।
अन अज्याःगु तुयूगु लः गय् यानाः वल धइगु खँ धाःसा सी मदुनि। लः विशेषज्ञतय्सं उगु लागाया च्वय् गनं तुयूगु रंग उत्पादन याइगु छुं कारखाना दयेमाः व अनं हे ल्वहं हितिइ थज्याःगु रंग ल्वाकज्याः वःगु जुइमाः धकाः अनुमान याःगु दु। तर ल्वहंहितिया लः वइगु मुहानया नापनापं अज्याःगु कारखाना गनं नं मदुगु खँ स्थानीय जनतां धाःगु दु।
यदि दुगु जूसां न्हापा थज्याःगु लः मवः, आः जक गय् यानाः वल धकाः नं उमिसं न्ह्यसः तयाच्वंगु दु ।
