नेवाः आन्दोलन संकुचित जुइ मजिउ
यल (सन्ध्या टाइम्स)/ललितपुर नागरिक अभियान व कवि क्याफेया मंकाः ग्वसालय् न्हूगु संविधानय् नेवाः नेवाः राज्य विषयय् सहलह ज्याझ्वः जुल। ज्याझ्वलय् न्ववासें नेपाली कांग्रेसया सभासद् तीर्थराम डंगोलं नेवाः आन्दोलन अझ नं सकसितं कःघानाः न्ह्याये फयाच्वंगु मदुनि धासें नेवाःत धइपिं 'घ्यःजा नं नये मयः, तरवार नं फये मयः' धइगु प्रवृत्तियापिं खः धयादिल ।
संघीयताया सवालय् आपालं नेवाःत अझ नं स्पष्ट जुइ फयाच्वंगु मदुनि धासें वय्कलं राष्ट्रिय सहमति कायम मजुइकं देय् संघीयताय् प्रवेश मजुइगु दावी नं यानादिल। संघीयताया खँ आयोग दयेकाः निर्धारण यायेमाःगु, अग्राधिकार बी मजिउगु बिचाः नेपाली कांग्रेसं तयाच्वंगु खँ नं वय्कलं कनादिल ।
नेवाः न्ह्यलुवा नवीन चित्रकारं नेवाः आन्दोलन संकुचित जुइ मजिउ तर थौंकन्हय् थज्याःगु हे संकुचनया आभास जुयाच्वन धयादिल। वय्कलं नेवाः व तामाङ ल्वानाः मखु मिले जुयाः वनेमाः धासें नेवाः व तामाङयात ल्वाकाः थन मेगु तत्वं लबः कायेत स्वयेफु धकाः नं शंका प्वंकादिल।
ग्वसाः खलःपाखें शाक्य सुरेनं नेपाली कांग्रेसया नेवाःत जातीय स्वशासनया पक्षय् दुगु सकारात्मक खँ धयादिल। ज्याझ्वलय् राजेश वज्राचार्य, अजितमान तामाङ, पद्म श्रेष्ठ आदिपिंसं नं नेवाः राज्यया बारे बिचाः प्वंकादीगु खः ।
