सुजाता लेखा समितिलय् स्पष्टिकरण बीमवनीगु
उपप्रधान नापं परराष्ट्रमन्त्री सुजाता कोइरालां सार्वजनिक लेखा समितिं स्पष्टिकरण कायेत सःतुगु बारे थम्हं छुं मस्यूगु खँ धयादीगु दु । नापं वय्कलं थःगु कार्यवस्तताया कारणं स्पष्टिकरण बीवने मलाइगु खँ धयादिल । वय्कलं धयादिल, 'समितिं सःतुगु जिं मस्यू व अन वनेगु जिगू फुर्सद नं मदु ।'
आइतवाः सुथय् मन्त्रिपरिषदया बैठक लिपाः पत्रकारत नाप खँल्हाबंला यानादिसें मन्त्री कोइरालां अज्याःगु खँ धयादीगु खः । समितियात अप्रजातान्त्रिक मनूतय् भीड जूगु अभिव्यक्ति ब्यूगुलिं वय्कयात समितिं चैत ८ गते स्पष्टिकरण बीत सःतुगु खः ।
अथेहे वय्कलं पत्रकारतय्त मेसिन रिडेबल पासपोर्ट (एमआरपी) भारतं हे छापे जुइगु खँ हानं छक्वं धयादिल । संसदया सार्वजनिक लेखा समितिं प्रतिस्पर्धाया आधारय् एमआरपी छापे यायेमाःगु निर्देशन विपरीत वय्कलं भारतं हे छापे यायेमाःगु अडान कयाच्वनादीगु दु ।
