थारु व ताम्सालिङं नीन्यागू जिल्ला बन्द
थारुतय् थीथी च्यागू संगठन व ताम्सालिङया बन्दया कारणं आइतवाः थीथी नीन्यागू जिल्लाया जनजीवन प्रभावित जूगु दु । च्यागू थारु संगठनतय्सं तराईया दक्वं नीनिगू जिल्ला बन्दया आह्वान याःगु दुसाः ताम्सालिङं धादिङ, चितवन व मकवानपुर जिल्ला बन्द याःगु दु ।
थीथी च्यागू थारु संगठनतय्सं तराईयात बहुप्रदेश दयेकेमाःगु नापं संविधान निर्माण यायेत ढिला जुयाच्वंगु व संविधानसभाया म्याद तनेगु तयारी यानाचवंगु विरोधय् तारईया दक्वं जिल्ला बन्दया घोषणा याःगु खः । अथेहे थारु संगठनतय्सं सरकारं वंगु दँया चैत १ गते थारु कल्याणकारिणी सभा लगायतया संस्था नाप खुगू बुँदे सहमति कार्यान्वयन मयाःगु धासें विरोध प्वंकूगु दु ।
बन्दया कारणं सुथंनिसें तराईलय् यातायात, बजाः, उद्योग, कलकारखाना बन्द जूगु दु । शिक्षण संस्था नं बन्द जुसां च्यागू तिगंया जिल्ला स्तरिय परिक्षा धाःसाः सुचारु याके ब्यूगु खँ थारु कल्याणकारिणी सभां धाःगु दु ।
अथेहे ताम्सालिङं संविधानसभाया राज्य पुनर्संरचना समितिं न्ह्यब्वःगु झिंप्यंगू प्रदेशया अवधारणा प्रति असहमति प्वंकूसें धादिङ, चितवन व मकवापुर जिल्ला बन्द याकूगु दु । बन्दया कारणं स्वंगूलिं जिल्लाया जनजीवन प्रभावित जूगु दु ।
