राज्य पुनर्संरचना पहिचान व सामर्थ्यताया आधारय् : एमाले
सत्तारुढ नेकपा (एमालें) राज्य पुनर्संरचना पहिचान व सामर्थ्यताया आधारय् जुइमाःगु खँ धाःगु दु । अथेहे संसदपाखें निर्वाचित प्रधानमन्त्री वा जनता पाखें प्रत्यक्ष निर्वाचित प्रधानमन्त्री बारे विवाद जुयाच्वंगु एमालें जनता पाखें प्रत्यक्ष रुपं निर्वाचित प्रधानमन्त्रीया अवधारणयात स्वीकार याःगु दु ।
छुं ई न्ह्यः निसें न्हायानाच्वंगु पार्टीया केन्द्रीय कमिटीया बैठकया निर्णय सार्वजनिक यायेत शनिवाः पार्टी मू ज्याकू बल्खुइ याःगु पत्रकार सम्मेलनय् बैठकं राज्यया पुनर्संरचना यायेगु इलय् पहिचान व सामर्थ्यतायात मू आधार दयेकाः अन्तरिम संविधानया व्यवस्था जूकथं राज्य पुनर्संरचना आयोग गठन यानाः प्रदशेतय् सीमाङकन, नामाङकन, संख्या व अधिकार वाँडफाँटा सम्बन्धी अन्तिम निर्णय यायेमा:गु खँ क्वःछिउगु बारे जानकारी ब्यूगु दु ।
नापं एमालें प्रत्यक्ष निर्वाचित प्रधानमन्त्री व सम्मानित राष्ट्रपतिया अवधारणायात मुलभुत रुपं स्वीकार यानाः राष्ट्रिय सहमतिया निंतिं लचकता क्यनीगु निर्णय सार्वजनिक याःगु दु ।
अथेहे एमालें राजनीतिक गतिरोध अन्त्य व लोकतान्त्रिक संविधान निर्माणया निंतिं केन्द्रीय कमिटीं पारित याःगु विशेष प्रस्तावया बारे नं जानकारी ब्यूगु ख: । प्रस्तावया बारे जानकारी बियादिसें पार्टी महासचिव इश्वर पोखरेलं विद्यमान राजनीतिक गतिरोध अन्त्य यायेत व दिगो शान्ति नापं लोकतान्त्रिक संविधान निर्माणया निंतिं दक्वः विषयलय् खुला सहलह यायेत पार्टी तयार दुगु धयादिल ।
