प्रधानसेनापतिया अभिव्यक्तिया छुं अर्थ मदु : खनाल
नेकपा (एमाले)या अध्यक्ष झलनाथ खनालं नेपाली सेनाया प्रधानसेनापति छत्रमानिसंह गुरुङं माओवादी लडाकुत समूहगत रुपं सेनाय् समायोजन यायेमफइगु धका: ब्यूगु अभिव्यक्तियात व्यक्तिगत जूगु धयादिसें उकीया छुं अर्थ मदुगु धयादिल ।
एमाले केन्द्रीय कमिटी बैठकया निर्णय सार्वजनिक यायेत शनिवाः पार्टीया मू ज्याकू बल्खुइ याःगु पत्रकार सम्मेलनय् वय्कलं बृहत शान्ति सम्झौता कथं सेनाय् माओवादी लडाकु समयोजन जुइगु धयादिल । सुनां नं ब्यूगु व्यक्तिगत टिप्पणीं सेना समायोजनय् छुं फरक मजुइगु दावीं नं वय्कलं यानादिल ।
वय्कलं नेपाः स्थित संयुक्त राष्ट्रसंघीय मिसन अनमिनं लडाकुतय् ल्याः उपलब्ध यायेमाःगु धयादिसें बरु उकीया निंतिं छु प्रावधान मिले यायेमाः धइगु खँय् सहमति यायेफइगु धयादिल ।
अथेहे शनिवाः सुथय् खोटाङया सदरमुकाम दिक्तेलय् पत्रकारत नाप खँल्हाबंला यानादिसें अध्यक्ष खनालं राष्ट्रिय मंकाः सरकार निर्माणया निंतिं एमालें न्ह्यागु त्याग व तपस्या यायेत नं तयार दुगु धयादिल । प्रमुख दलतय् सहमति बिना संविधान जारी याये मफइगुलिं एमालें मंकाः सरकारया निंतिं विकल्प खुल्ला तयातःगु धयादिल ।
