इलय् संविधान जारी मजुसाः भयावह स्थिति : थापा
राष्ट्रिय प्रजातन्त्र जनशक्ति पार्टीया नेता सूर्यबहादुर थापां संविधान जारी यायेत क्वःछिनातःगु ई जेठ १४ दुने न्हूगु संविधान जारी यायेमफुसाः देशय् भयावह स्थिति सृजना जुइगु खँ धयादीगु दु ।
थःगु च्यय्स्वदँया बुदिंया लसताय् ग्वसाःग्वःगु तुच्चा ज्याझ्वलय् नेता थापां जेठ १४ तक नं संविधान जारी मजुसा: राजनीतिक 'भ्याकुम' वयेफइगु पाखे सचेत जुइत दलतय्त इनाप यानादिसें अज्याःगु इलय् ल्ह्वनीगु पलाखं भयावह स्थिति सृजना याइगु ख्याच्वः बियादिल ।
पुलांम्ह प्रधानमन्त्री नं जुयादीम्ह थापां संविधानसभाय् दकलय् तःधंगु दल माओवादी संविधान निर्माण यायेगु स्वयां सरकार परिवर्तन यायेगुलि लगेजुयाच्वंगु द्वपं बियादिल । वय्कलं आःया ई संविधान निर्माण यायेगु धयादिसें सत्ता प्राप्तिया ज्याय् मगेजुयाच्वंगु माओवादी सहमतिया बाधक जूगु धयादिल । वय्कलं इलय् हे संविधान जारी यायेत दक्वं दल छप्पँ जुइमाःगु खँय् ब: बियादिल ।
