सेनायात समूहगत लडाकु समायोजन अमान्य
नेपाली सेनां माओवादी लडाकूतय्त समूहगत रुपं नेपाली सेनाय् समायोजन यायेमज्यूगु खँ धाःगु दु ।
नेपाःया भ्रमणय् दीम्ह संयुक्त राष्ट्रसंघया राजनीतिक मामिला सम्बन्धी उपमहासचिव बी लिन पास्को नापया खँल्हाबंलाय् नेपाली सेनाया प्रधानसनेपती छत्रमानिसंह गुरुङं थंज्याःगु प्रतिक्रिया बियादीगु खः । सेनाया जंगी अड्डाय् जूगु खँल्हाबंलाय् पोस्कों प्रधानसेनापतियात नेपाली सेनाय् गुलि लडाकु समायोजन यायेमफइ धकाः न्ह्यस: तयादीगु खः ।
लिसलय् प्रधानसेनापति गुरुङं बृहत राजनीतिक सहमति पश्चात व्यक्तिगत हैसियतय् स्थापित मापदण्ड पूवंकूपिंत समायोजन यायेफइगु धयादीगु खँ सैनिक जनसम्पर्क निर्देशनलायं पिथंगु विज्ञप्तिइ न्ह्यथंनातःगु दु । अथेहे विज्ञप्तिइ अज्याःगु मापदण्ड पूवंकाः व्यक्तिगत रुपय् समायोजन याःपिं लडाकुतय्सं थःपिंत पूर्णतया गतिविधि क्रियाकलापं अलग तयेमाःगु खँ धाःगु दु ।
विज्ञप्तिइ प्रधानसेनापतिया धापू उद्यृत यासें राजनीतिक रुपं अभिप्रेरित लडाकूतय्सं राजनीतिक गतिविधि संचालन यानाः नेपाली सेनाया सत्यता, इमान्दारीता, निष्पक्षता व सांगठनिक एकता खण्डित जुयाः संगठन विभाजन जुइफइगु सम्भावनायात नकारे यायेमफइगु खँ न्ह्यथंनात:गु दु ।
(किपा :- नेपाली सेना)
