संविधान निर्माण मजुसाः माओवादी जिम्मेवार : देउवा
'लडाकु समायोजन यायेमबीयाः मेगु चुनाव त्याकेगु रणनीति'
नेपाली कांग्रेसया वरिष्ठ नेता शेरबहादुर देउवां इलय् हे संविधान जारी जुइमफुसाः उकीया जिम्मेवारी माओवादी जुइगु खँ धयादीगु दु । वय्कलं माओवादीं न्हापा याःगु समझदारीत कार्यान्वयन मयासें शान्ति प्रकृया स्यंकेत स्वयाच्वंगु द्वपं बियादिल ।
नेपाल विद्यार्थी संघं शुक्रवाः धनगढीलय् याःगु प्रशिक्षण ज्याझ्वःया उल्लेज्या यानादिसें वय्कलं माओवादीं शान्ति सम्झौताय् न्ह्यथंनातःगु सहमतित व्यवहारय् लागु मयासें एकदलीय सर्वसत्तावाद लादे यायेत स्वयाच्वंगु धयादिल । वय्कलं एकदलीय सर्वसत्तावाद नेपालय् छुं नं हालतं लागु मजुइगु व अथे जुसां टिके जुइमफइगु दावी यानादिल ।
पुलांम्ह प्रधानमन्त्री नं जुयादीम्ह देउवां स्वतन्त्रता बिनाया समाजया परिकल्पना नं यायेमफइगुलिं नेपालय् स्वतन्त्रताया लडाँइलय् लगे जुइत विद्यार्थी नेतातय्त इनाप यानादिल ।
उखे प्रेस युनियन पर्सां शुक्रवाः वीरगंजय् याःगु पत्रकार सम्मेलनय् कांग्रेस उपसभापति प्रकाशमान सिंहं माओवादीं लडाकुतय् समायोजन न्हूगु संविधान लिपाः जक यानाः मेगू चुनाव त्याकेगु रणनीति दयेकाच्वंगु द्वपं बियादिल । वय्कलं न्हूगु संविधान जारी याये न्ह्यः हे माओवादी लडाकु समायोजन जुइमाःगु खँय् बः बियादिसें जेठ १४ गते दुने हे संविधान जारी यायेमाः धयादिल ।
