माओवादीं हिंसा मत्वःतुगु धासें अमेरिकां च्यूताः प्वंकल
शान्ति सम्झौता विपरीत नेपाःया माओवादीतय्सं गैरकानुनी बल छ्यलाः अपहरण, हिंसा, धम्की जारी तःगु प्रति अमेरिकां च्यूताः प्वंकूगु दु । अमेरिकां माओवादी राजनीतिक मूलधारय् वसां नं शान्ति सम्झौतायात प्रतिकूल लिच्वः लाइगु कथं ज्या यानाच्वंगु खँ धाःगु दु ।
अमेरिकी विदेश मन्त्रालयं ११ मार्चय् राष्ट्रगत मानव अधिकार प्रतिवेदन जारी यासें माओवादी कार्यकर्तां स्वेच्छाचारी व गैरकानुनरी रुपं घातक बल छ्यःगु व अपहरणय् संलग्न जूगु खँ धाःगु दु । प्रतिवेदनय् बृहत शान्ति सम्झौताया प्रतिकूल माओवादी व वया भातृसंगठनतय्सं ज्यादती कायम याःगु खँ न्ह्यथंनातःगु दु । माओवादीं व्यवसायी, मजदूर, स्वतन्त्र नागरिक व गैरसरकारी संस्थां नियमित रुपं जबरजस्ती ध्यबा असुली याःगु खँ प्रतिवेदनय् दु ।
अमेरिकी विदेश मन्त्री हिलारी क्लिन्टनं सार्वजनिक यानादीगु प्रतिवेदनय् झिंदँया माओवादी युद्धया इलय् बेपत्ता जूपिं मनूतय् अवस्था थ्व दँय् नं अज्ञात जूगु धासें २००३य् माओवादी सम्बद्ध जूगु शंकाय् येँया महाराजगंजया व्यारेकय् कुनातःपिं पीगुम्ह बन्दीत बेपत्ता जूगु बारे ओएचसिएचआरया प्रतिवेदनय् सरकारं छुं पलाः मल्ह्वंगु खँ धयातःगु दु ।
अथेहे प्रतिवेदनय् नेपाःया पत्रकारतय्त आक्रमण जुइगु ज्या अप्वःगु धासें संचारकर्मी व पत्रकारतय्त सशस्त्र पुचः व राजनैतिक दलं सुनियोजित रुपय् लक्षित यानाः आक्रमण याःगु खँ धाःगु दु । नापं उकी विशेष यानाः मिसा पत्रकारतय्त आक्रमण अप्वःगु खँ प्रतिवेदनय् न्ह्यथंनातःगु दु ।
