सरकार हे अराजकतापाखे

दिलीप शाही 'शान्तियज्यु'

थौं देय् झनझन अराजकताया चाकलय् लाना वनाच्वंगु दु। थनिं छुं न्हि न्ह्यः जक जनकपुरय् छम्ह सञ्चार उद्यमीया हत्या जुलसा मेखे येँ तसकं व्यस्त व सुरक्षित धयातःगु लागाय् छम्ह चिकित्सकयात गोलीं कयेकाः स्यायेगु कुतः जुल ।

थनिं लछि ति न्ह्यः जक येँय्या तसकं सुरक्षित धयातःगु व आपालं सुरक्षाकर्मीतय् उपस्थिति दइगु थाय् लाजिम्पाटय् सञ्चार उद्यमी जमिम शाहया हत्या जूगु खः। उगु हत्याय् सुरक्षा निकायय् ज्या यानाच्वंपिं सुरक्षाकर्मीतय् तकं ल्हाः दुगु खँ तत्कालिन इलय् सार्वजनिक जूगु खःसां नं राजनीतिक स्वापूया कारणं छम्ह उच्च तहया सुरक्षाकर्मीयात सरकारं तत्काल कारवाही याये मफुगु खः। तर आः वयाः उम्ह सुरक्षाकर्मीया ल्हाः उगु हत्याकाण्डय् दुगु खँ छानवीनया दथुइ यचुक सी दयेवं वयात बिसिउँ वनेत बांलाःगु अवसर चूलाःगु दु ।

मेखे व्यापारी हत्यायात कयाः व्यापारीतय् पुचलं प्रधानमन्त्री माधव नेपालयात नापलानाः थःपिनि सुरक्षाया ग्यारेन्टी जुइमाःगु माग याःगु खःसा लिसलय् प्रधानमन्त्री नेपालं व्यापारीतय् सुरक्षाय् थः लाचार जूगु खँ व्यापारीतय्त धाःगु खः। छम्ह देय्या शासन सत्ता ल्हातय् कयाच्वंम्ह प्रधानमन्त्रीं जनताया जिउधनया सुरक्षा याये फइ मखु धकाः लाचारी क्यनेगु खःसा अज्याःम्ह प्रधानमन्त्रीयात कुर्सिइ च्वनाच्वनेगु गुलि तक ल्वः धइगु न्ह्यसः न्र थन ब्वलनाच्वंगु दु ।

अथे हे छगू ज्याझ्वलय् न्ववासें गृहमन्त्री भीम रावलं पत्रकारतय् कारणं यानाः शान्ति सुरक्षा स्यना वनाच्वंगु द्वपं बिउगु दु। थम्हं यायेमाःगु ज्या मयासे देशय् सुरक्षास्थितयात क्वातुकेगु त्वःताः आम जनतायात थुकथं गृहमन्त्रीं हे अनावश्यक खँ ल्हायेगु खःसा आः जनता सुयागु भरय् च्वनेगु धइगु न्ह्यसः नं थन ब्वलंगु दु। अथे जुयाः प्रधानमन्त्री व गृहमन्त्री निम्हेसियां थज्याःगु धापुतिं ला थ्व सरकारया औचित्य गुलि दनि धइगु न्ह्यसः नं थन ब्वलनाच्वंगु दु।
च्वय् न्ह्यथनागु थ्व केवल प्रति निधि घटना जक खः। माओवादीया सरकारयात क्वःथलाः वर्तमान सरकार नीस्वनेगु ज्या जूसां नं देशय् अराजकता अप्वया वनाच्वंगु महसुस आम जनतां याना हयाच्वंगु दु ।

थ्व सरकार गठन जुइ धुनेवं देशय् आर्थिक अराजकता ब्वलनाः देशय् थौं आर्थिक रुपं तहसनहस जुयाच्वंगु दु। तर देय्या सरकार प्रमुख धाःसा न्हिछिया स्वंगू प्यंगू ज्याझ्वःया उलेज्या यायेगुली थःत लिकुंकाच्वंगु दुसा सरकारय् दुथ्याःपिं मेपिं मन्त्रीतय्सं नं थज्याःगु हे ज्या यानाच्वंगु दु। तर, देय् व जनताया निंतिं धाःसा वर्तमान सरकारं छुं हे ज्या यानाच्वंगु मदु। खालि थःगु कुर्सि जक ल्यंकेगु कुतः सरकारं यानाच्वंगु दु ।

खतुं सरकार गठन लिपा प्रहरी प्रशासन दुने राजनीतिकरण हावी जुया वनाच्वंगुलिं देय्या सुरक्षा व्यवस्था बल्लाये मफुगु खँ स्वयम् प्रहरीया उच्च ओहदाय् च्वनाच्वंपिंसं धायेगु यानाच्वंगु दु। अले थुकिया लिपांगु दसु धइगु जमिम हत्या काण्डय् ल्हाः दुगु खँ स्पष्ट जुइधुंकाः नं उम्ह प्रहरी बिसिउँ वनेत ताःलाःगु दु ।

अथे हे देशय् आम जनतायात न्हियान्हिथं माःगु उपभोग्य वस्तुया भाः थहां वनाच्वंगु दु। सरकारं थुखेपाखे मिखा ब्वये फयाच्वंगु मदु। थुकिं यानाः जनता थिकेगु बेसाः भाः पुलाः म्वायेत बाध्य जुयाच्वंगु दुसा उखे हाकु बजाः याइपिंसं जनतायात मदयेक मगाःगु सामान सुचुकाः जनतायात दुःख बियाच्वंगु दु। तर सरकारं धाःसा थुखेपाखे भ्याः भचा हे चिउताः क्यनाच्वंगु मदु। थगुने जक सरकारं चिनी किलोया ५२ तका कायेगु धकाः घोषणा याःगु खःसा हाकुबजाः याइपिं व्यापारीतय्सं चिनी सुचुका बीवं अन्ततः स्वयम् सरकार व्यापारीतय् न्ह्यःने लाचार जूगु जक मखु हाकु बन्जाःतय्सं अघोषित रुपं कयाच्वंगु भाः (अथे धइगु प्रतिकिलो ८२) तका कायम यायेत नं सरकार बाध्य जूगु दु। थनथाय् लाक्क न्ह्यसः थ्वहे खः कि हाकु बन्जाःतय्त कारवाही यायेगु पलेसा सरकारं हे थुकथं छाय् भाः क्वछित?

अथे ला थ्व सरकार जनताया म्यान्डेट दुगु सरकार मखु। जनतापाखें तिरस्कार जूपिं व संविधानसभाया चुनावय् थःगु अस्तित्व क्यने मफुपिंसं चले यानाच्वंगु सरकार खः थ्व। थुकिया मू ज्या धइगु देशय् शान्ति सुरक्षा कायम यानाः इलय् संविधान जारी यायेगु खः तर मयासे थःगु न्हय्गू पुस्तायात गाक्क कमे यायेगु ज्या जुयाच्वंगु आपालं दसुत लुया वःगु दु। नकतिनि जक परराष्ट्रमन्त्री सुजाता कोइरालां कमिसनया हे लोभय् भारतं रिडेबल पासपोर्ट छापे यायेगु निर्णयनिसें कयाः पुलांम्ह प्रधानमन्त्री गिरिजाप्रसाद कोइरालायात वासः यायेत जूगु खर्च आदियात कायेफु।
अथे हे प्रधानमन्त्री माधव नेपालं थः किजायात हङकङया वाणिज्य दूत नियुक्तिया लिसें आपालं मखुगु ज्या वर्तमान सरकारं यानाच्वंगु स्पष्ट जू ।

छखे देशय् व्यापार व्यवसाय ठप्प जुयाः उद्योगधन्दा बन्द जुयाच्वंगु दुसा मेखे भारत व नेपाः दुथुइ व्यापार घाटा अप्वया वनाच्वंगु दु। थुकिया दथुइ देय् आर्थिक रुपं टाथ जुइगु अवस्थाय् थ्यनेधुंकाः नं सरकारं राष्ट्र बैंकया गभर्नर छम्ह हे नियुक्ति याये फयाच्वंगु दु। राष्ट्र बैंकया छम्ह गभर्नर तकं नियुक्ति यायेमफुृगु धइगु तःधंगु दुर्भाग्यया खँ खः। थौं देय् आर्थिक रुपं बांमलाःगु चाकलय् लानाच्वंगु इलय् तकं गभर्नरविहिन जुइगु धइगु आर्थिक रुपं हाकनं मेगु समस्या ब्वलंकेगु नियत जकं मखुला धइगु न्ह्यसः नं ब्वलनाच्वंगु दु।
सरकार गठन जूसां नं आः तक सरकारया असफताया दसु न्ह्यब्वयेगु खःसा थज्याःगु ताः हाकःगु हे धलः पिहां वयेफु। अथे जुयाः वर्तमान इलय् यदि देय्यात बचे यायेगु खःसा छपु जक बांलाःगु लँपु धइगु वर्तमान सरकारया विघटन हे खः। थ्व सरकारयात यथावत तयाः न त देशय् ब्वलनाच्वंगु असुरक्षायात हे थातं तये फइ न त आर्थिक रुपं डाँवाडोल जूगु देय्या अर्थतन्त्रयात हे थकाये फइ। अथे जुयाः आः वयाः थ्व सरकारयात इलय् हिले मफुत धाःसा थुकिं देशय् ब्वलंकीगु अराजकतां निश्चित रुपं जनतायात दुःख बीगु बाहेक मेता याइगु आशा आम जनतां यानाच्वंगु मदु ।

More Stories Like this