'लडाकुतय् विवरण मदुसाः ध्यबा निकासा जुइमखु'
सूचना व संचार मन्त्री नापं सरकारया प्रवक्ता शंकर पोखरेलं माओवादीं लडाकुतय् विवरण मब्यूसाः उमित सरकारं बियाच्वंगु ध्यबा निकासा दिकेगु ख्याच्वः बियादीगु दु ।
प्रेस चौतारीं शुक्रवाः धनगढीलय् याःगु पत्रकार नापलायेगु ज्याझ्वलय् सरकारी प्रवक्ता पोखरेलं माओवादीं लडाकुतय् नांमय् बुझेयाइगु ध्यबाया दुरुपयोग यानाच्वंगु द्वपं बियादिसें माओवादी शान्ति प्रकृया प्रति इमान्दार मजूगु द्वपं बियादिल । नापं वय्कलं माओवादी इमान्दार मजूगुलिं हे लडाकुतय् विवरण मब्यूगु नापं धयादिल ।
माओवादी लडाकुया विवरण बीत अस्वीकार याःगु अनमिन प्रति नं आक्रोस प्वंकादिसें मन्त्री पोखरेलं अनमिनं लडाकुया विवरण बी हे माःगु अडान कयादिल । वय्कलं लडाकुतय् पुनःस्थापना व समायोजन यायेत नं विवरण अत्यावश्यक जूगु धयादिल ।
अथेहे वय्कलं वर्तमान सरकारं हे शान्ति प्रकृया व न्हूगु संविधान जारी याइगु धयादिसें सरकारया विकल्प मालाच्वंसाः न्हूगु संविधान नं जारी मजुइगु व शान्ति प्रकृया नं निष्कर्षय् मथ्यनीगु धयादिल । वय्कलं आः ऐतिहासिक हलचलया ई जूगुलिं देय्या शान्ति सुरक्षा स्वभाविक जूगु धयादिल । न्हापाया गृहमन्त्रीतय् थें आःया गृहमन्त्रीया नं आलोचना जूगु धासें गृहमन्त्री भीम रावलया बचाउ यानादिल ।
