लेखा समितिं सुजाता नाप स्पष्टिकरण काइगु
सार्वजनिक लेखा समितिं उपप्रधान नापं परराष्ट्रमन्त्री सुजाता कोइराला नाप समितिया विषयलय् ब्यूगु अभिव्यक्तिया बारे स्पष्टिकरण काइगु जूगु दु । छुं ई न्ह्यः मन्त्री कोइरालां समिति अलोकतान्त्रिक पुचःया भिड जूगु अभिव्यक्ति बियादीगु बारे समितिं स्पष्टिकरण कायेत्यंगु खः ।
समितिया शुक्रवाः च्वंगु बैठकं कोइरालाया उगु अभिव्यक्ति प्रति आपत्ति प्वंकूसें स्पष्टिकरण कायेगु निर्णय याःगु खः । वंगु फागुनय् मिसिन रिडेवल पासपोर्ट (एमआरपी)या छपाई सम्बन्धी समितिं ब्यूगु निर्देशन प्रति असन्तुष्टि प्वंकादिसें वय्कलं अज्याःगु अभिव्यक्ति बियादीगु खः ।
समितिं मन्त्री कोइरालायात स्पष्टिकरणया निंतिं चैत ७ गते सःतुगु दु । समितिया बैठकं पासपोर्ट छापे यायेगु बारे प्यंगू कम्पनीनापया टेण्डर प्रक्रिया रद्ध मयायेत निदेशन नापं ब्यूगु खः ।
मन्त्री कोइराला नापं विदेश भ्रमण क्वचायेकाः बिहीवाः येँ थ्यंकादीम्ह समितिया सभापति रामकृष्ण यादव धाःसाः थौंया बैठकय् उपस्थित जुयामदी । वय्कया अनुपस्थितिइ समितिया थाकालिम्ह दुजः रामनारायण सिंहं बैठक न्ह्याकादीगु खः ।
