गोलीं क्येकूगु विरोधय् विराटनगर बन्द

नेकपा (एमाले) समर्थित युवा संगठन युथफोर्सया मोरङ संयोजक नापं निम्हेसित अज्ञात पुचलं गोलीं क्येकूगु विरोधय् युथफोर्सया कार्यकर्तातय्सं शुक्रवाः विराटनगर बन्द याकूगु दु । आक्रमणया विरोधय् शुक्रवाः सुथय् विराटनगरया जनपथय् मुनाः पिहांवःगु जुलुसं विराटनगर बजाः बन्द याकूगु खः ।

बिहीवाः सनिलय् मोटरसाइकलय् व:पिं निम्हेसिनं क्येकूगु गोलीं लाना युथफोर्सया परशुराम बस्नेत व ग्वाहालिमी परशुराम राई घाःपाः जूगु खः । गोलीं लाःपिं निम्हेसितं विराटनगरया कञ्चनवारीलय् च्वंगु नोवल मेडिकल कलेजय् वासः याकातःगु दु ।

मोरङ प्रहरीं घटनाय् संलग्न जूगु आशंकाय् शंकास्पद नीप्यम्ह मनूतय्त नियन्त्रणय् कयाः छानबिन शुरु याःगु दुसाः विराटनगरय् प्रहरीया सक्रियता नं अप्वयेकूगु दु ।